Uff andingen Jacoben Meyers von Willisouw unnd
gebot herren rhadts richers Rudolff Moeren ist
nachvolgende khundtschafft gegen und wider herr houptmann
Hanns Casparen Sonnenberg yngenommen frytagen
nach dess heilligen crützes erhochung tag 1592
Unnd namblichen so bezügt Hanns Schlaten ouch von Willisouw
dz er züg Bartlin Meyers mit gspan gsin und ann dem
tag wie man morndess musteren wöllen und er züg inne
Bartlin Meyer uff dem tross cranck nacher füeren lassen
sye er gestorben. Da er züg glich angends zu houptman
Sonnenberg und sinem schriber gangen und ihnen sollichs
anzeigt und befragt ob er inne bestäten oder ob sy
sy inne den abgestorbnen noch in der musterung gut
machen oder wie er ime thun solle. Habe der
houptman und schryber ime zügen bevolchen solle in
nit vergraben, wollen inne ouch musteren lassen
volgendts hernach habend sy den muster herren zu
dem abgestorbnen gefüert und zeigt darnach der
musterherr alls er inne gesechen fort gerüten
er züg aber möge nit wüssen ob er in der musterung
gut gemacht worden oder nit. Sines sohns halben habe
ime der schryber selbs anzeigt sye gemustret worden.
Hanns Mörigen ouch von Willisouw bezügt Bartlin
Meyers säligen sohns halben. Dz er züg ouch
cranck gsin und sin sohn by ime zügen und alls
mann musteren wöllen, unnd der muster herr
khommen habe er sy all ab zelt und in die musterung
gerechnet. Nit möge er züg wüssen ob diser
sin Bartlin Meyers sohn erst hernach widerumb uss
der musterung gethan worden oder nitt.
Mathys Demperlin ouch von Willisouw redt und bezügt
mir Hanns Moriger obgenannt dz gedachts Meyers
säligen sohn ouch neben ime gemustert worden
(2)
Uff andingen Hansen Eickerts (?) ouch von Willisouw
unnd gebot hern rhaats richters Rudolff Mooren ist
nachvolgende khundtschafft gegen und wider obgenanten
houptmann Sonnenberg yngenommen uff dato wie
obstat.
Und namblichen so bezüget Caspar Meyer ouch von Willisouw
dz er sampt sinem nachvolgenden mitgspanen ouch zuo ime
houptmann Sonnenberg dingen wöllen. Habend aber
ime luter vorbehalten dz sy wollend was er ihnnen
heise ihnnen ouch gehalten werde. Dann sy im faal
nit also vor gricht und recht wöllendt umbherr
zögen werden syendt obgenanter Eickert und ander
meer ouch doby gsin, habe houptman Sonnenberger
ihnnen luter versprochen und geredt dz ia was
er ihnnen verspreche wöllendt er und sin vetter
ihnnen gethrüwlich halten, unnd was sin vetter nitt
halte, wölle er halten.
Hanns Heinrich Grundlen ouch von Willisouw redth
und bezügt glychförmig wie Casper Meyer erst
genant.
Hanns Münd ouch von Willisouw bezügt dz iungkher
Jacob Sonnenberg ihnen zügen und anderen noch woll
20 sinen mitgspanen all von Willisouw by dem
schützenhuss vor dem sy hinweg zogen zuo ihnnen
khommen und befragt under wölichem houptmann sy
syendt, habend sie ime geanttwort underm Sonnen
berg habe I. Jacob ihnnen geantwort dz in
er ist min vetter, und ziechend nur gwaltig mit
ime darann was er nüth nit zalt wil ich eüch zallen.
(3) [neues Dokument]
Wyr dr Schultheis unnd Rhat zu Wyllisouw bekennentt uns offentlichen
mit dyserm brieff das uff hüt sines dattums alls wyr im
rhattswyse by ein anderen versamptt gwessen vor uns erschinen
ist dye erbar dugentthafftt fromm Marya Meyrin wyllendtt,
Bernhartt Knüwbüellers unser bürggers eelicher gmachell und han uns
brichtt und angezeigtt wie das sy kunttschafftt dr warheitt gegen und
wyder houpttman Hans Caspar Sonnenberg nottwendig mitt bitt inen
die ouch unserem stattschriber nach hörn des richters uff und inn zu
nemen und gschriffttlichen zu überanttwurtten, welches wir iro zu
fürdrung dr warheitt gern zu glassen alls harnach volgett.
Jost Haas unser ampttsgens redtt und bezügtt harum by sinem
geschworen eydtt, es habe sich begeben ietzund im letstenn frackrischen
zug als si in Edaberk er und sine gspanenend Bernhartt Knüwbüeller
mitt inen, syendtt über das wasser gfaren und zu landtt komen
syentt ein theill dem waldtt zu gangen und ein theill den aneren
wegg und welche gegent dem waldtt zu gangen die syentt gan Paris
komen, under denen sye Bernhartt Knüwbüeller gsin, dan er züg und
sine gspanen inn dn fürchin nitt mer gsechen habentt, sunst habe er dem
houpttman die zwölff monatt redlich und erlich gedienett sine züg und
wachtt versechen alls einen erlichen kriegsman zu stande, syendtt inen
fill allso erschossen und uff Paris zu komen houptlütt und ander knecht
witters sye ine nitt zu wüssen.
Oswaldtt Schwendiman unser mitbürger bezügt harum by sinen gschworen
eydtt glicher gstalt alls Jost Haas dann er züg und sinst inen fill by
ein anderen gsin alls sy über gfaren und von ein andreren komen
syendtt, da habe Caspar Sutter anzeytt Bernhartt Knüwbüeller sye mitt
ime vor Paris dannen hett man witt uffher zegren (?) welches er züt nüt wüssen
mögge, witters wüsse er nitt.
Zu erkhendtt schwer (?) ich Hans am Rein der zitt Schulheis zu Willisouw ine diesen
brieff mitt minem eignen uffgetrukten sertt insigell trowen und gelenhassten
mir und miner eren im allwetzzt uns schaden samstag vor sant
cristii anno 1592.