Donstags vor S Jacobs tag A 1592 ist

Balthasar Huwyler von Rüeggeringen uss

der Graffschafft Rottenburg in MGH gfan-

genschafftt komen umb und von wegen das

er mitt denen von Zürich gan Strass-

burg züchen wöllen, unnd nach dem ime

die sach mitt allem ernst fürgehallten worden

hatt er disen bscheid geben.

Namlich ungefaar vor 14 tagen alls er

von armuott wegen ins Bernpiett gangen in

willen daselbs zuohellffen schnyden unnd

er under tagen uff dem felld gelägen syent

iren 3 oder 4 uff einem kriessbaum gsin und

kriesi gwunnen, die habe er gehörtt mitt

ein andern reden und under anderem habent

sy anzeigt wie das die Lucerner aber kriegs-

lütt annement, sy wöllent abermallen dahin

gan und sy beschyssen gelltt nemen unnd

dann nitt züchen. Daruff er desselbigen

tags zuo zweyen so sich von Römerschwyl

genannt kenne aber sy nitt komen, denen

er sölliches was er von den obvermellten

uff dem kriessbaum gehörtt anzeigt, wölli-

che demnächsten sich mitt ime verglychen wöl-

lent glycher gstalltt gan die berner so

damalen zuo Lentzburg knecht angenommen

beschyssen. Alls sy gan Lentzburg komen

unnd er sich für die amptslütt gestellt

habent

(2)

sy inne glychwol eigentlich beschawet

unnd alls sy funden das er nitt uff

ir landsgattung bekleidt gsin habent

sy synen nütt gewöllen und ime ein

dickenpfenning geben und widerumb

fort züchen heissen, derwylen sy

inne allso beschawet habe er ime gar

übel gefürchtet wurdent inne ettwan

fachen und examinieren von wannen er

sye. Alls ime nun der dickenpfenning

worden sye er widerumb zuo ver-

mellten sinen gsellen komen und

umb den dicken brott kaufft und

dasselbig mitt inen getheillt. Alls

er nun widerumb heimbd komen habe

er sölliches anzeigt wie ime ergangen

sye, daruff inne der weibel ge-

fengklich allhar bracht, er sye aber

gantz und gar nitt gesinnet gsin mitt

inen hinweg zezüchen er wöllte sich

sonsten mitt diser sach niemert mercken

haben lassen, allein sye es der meinung be-

schächen damit er gellt von den Ber-

nern bekomen möchte diewyl er von

denen uff dem kriesbaum gehörtt das sy

die h hauptlütt von Lucern auch allso

beschissen habent. Unnd ob er hieran

gefällt bitte er MGH umb gnädige

verzychung.

Ist uff ein gewont urfechd ussgelassen.