Fromen vesten fürsichtigen ersamen und wissen

gnedigen heren obren und vätter u e v

sye ieder zitt min armer dienst nach minem

vermogen bereydt, das schriben von uwer e v

an die uwern hab ich empfangen ouch vor den

uweren erlässen lassen, hierum die uweren und

ich mitt innen u w, als unseren gnedigen

heren und vättern zuo dem höchsten und trungenlichosten

dancksagen sindt ouch gutter hoffnung wir unns

gentzlichen nach uwerm gevallen tragen wollend g.

Demnach günstigen gnedigen heren und vätter

so hatt der her von Boysrigault, unserm

heren von Sant Julian geschriben, wie dan nächst

verschiner mustrig und zallig etliche grose zalle

ungehorsamer knechte us der eidgnoschafft von unns

widerum heim geloffen, und als sy heim komen

und gefragtt worden ursach sölches ires heim

louffendts sye iro antwurtt nütt anders dan das

inne von den houptlütten nitt gehalten das so inne

verheissen, sonders inen ir besoldung abgebrochen

worden, zum andren, wie es hie by uns mercklichen

tür sye aber mas niemantt by sölchem klein

fuegen sold bestan mogen, hierum gnedige heren und

vätter will mir notthurfftig sin mich miner eren halb

zu verantwurten und entschuldigen, und will

mich alsso gegen u e w, entschuldigt haben d...

welche die sindt, die under minem fendly gewesen

die von mir reden das ich sy nitt erlich und woll was

ich inne verheissen bezalt habe, die liegent mich

schandtlichen und lasterlichen an und thunt mir

hieran gwalt unnd unrecht, des bezüg ich mich

an mine amptslütt und die ubrigen gehorsamen knecht

(2)

Wir sind ouch alwegen am andren tag eins ieden

ingangne monats gemustrett und erlich von den

heren bezalt worden, da ich von stundan uber

gesessen und angefangen die knecht zu bezallen

des glichen die düre der essigen spis zu ver antwurten

fug ich u e w zu vernemen das es nitt

also wie sy fürgeben und das mencklich des

bericht hab so findt man einen pünten des

besten weins den türsten um ein gros um ein

gros brodt, das dri man uber ein mall

gnug zuo essen haben item ein lib fleisch

um i gros denne ouch der kleine besoldung

halb gib ich das zu antwurdt, das mencklicher

vor und e gewist was ich im geben welt

hieruff gnedigen heren und vätter, bedunckt mich

so iemants nott were zuo beklagen so were ichs

ursach das die uweren k m und mir das

min abgenomen entragen und angesechen

die ordinantz so sy geschworen, darin heitter

begriffen nitt nur dri monat nir nur [Am Rand, evtl. hier passend: weder mengklich] ein

iare sonders so lang uns k m dienst

giptt zu dienen us genomen so es uch unsere väter

und unser vaterlandt antreffen wurde.

Ich hette wol gemeint ich sölches verumglimpfens

von den heimlouffenden erlosen lütten enpresten

sin dan ettlich und vil deis (?) so den armen

lütten hie an ein peyllen gesen die nit bezalt

sonders an alle pasaportt hinweg uber

ire eid geloffen, doch sindt etliche der uwern

die ich mitt namen wol weis sölches heimlouffens

ursächer und uffwigler gesin, hierum

gnedigen heren obren und vätter so

(3)

ist min höchste pitt an u e w, die welle

nitt allwegen sölchen klein muottigen lütten

gelouben geben, dan ich mich mitt hilff des almecht.

der was 8 tagen das dhein sölche klegtt ab mir komen

sol, es haben ouch gmein mine lieben heren und

bruder die houptlüt gmeine heren den eidgenon. geschriben und

sich glicher gestaltt verantwurten lassen Nüwer

zittung weis ich nütt sonders, der üwer

Petter Gutter und ich mitt im thunt uns

u e w ieder zitt wol bevelchend, der all

mechtig und die wirdig Maria welle u w

in hochen eren alwegen erhalten. Datum

freitag sant johans bapta abendt anno 1542

zu Wigen inn Piedmont

Uwer gnaden

alzit armer williger diener

Batt Golder