Hochgeachte edle...

... was uns sidhar verursachett

das wir e g e w nitt zugeschryben, wie alle sachen

unsers Reigenments halben beschaffen, auch die in nemung

der veste Prigorast harlangende, sindt wir one zwiffel

e g e w dero gnuogsame berichtnuss tragen werden,

begerend wir hierin uns zu entschuldigen, diewyl ir fl dhl

in der belagerung uns stetz gebetten und fründtlich zugesprochen

ein wenig geduoltt zehaben, darneben uns vertröst nach

innemung der veste unser zallung halben ein guten willen

und satisfacion versprochen, welches wir glaubt auch angesechen

die unsicherheit und infallung des vyends, derwegen uns

ein zimliche grosse summa uffgelauffen, alls nun ir fl dhl

den 30 octobris mitt der gantzen armada widerumb abzogen

uff Pinerölla sich begeben, unser Reigenment daselbst in

ein vorstatt helegertt, und vermeint unsere zallungen zuo

empfachen, welches aber bishar nit beschechen, sonder uns

abermallen mit einer ringen und kleinen summa gellts ab-

thädigen wöllen, derhalben wir all gemeinlich mit unserm

herren obristen zuo ir fl dhl gen Thurin geritten vor der-

selbigen uns höchlichen erklagt, wie wir in söllicher gestallt

wie bishar beschechen uns nitt mäglich witter zedienen sye,

begerend derhalben unsere zallung oder den urlaub, domit

(2)

wir unsere erliche kriegslütt in guotter pollezey erhallten mögen,

wartten also uff ir fl dhl resulation ob sy uns den dienst oder

den urlaub zu sagen werd, sonst wz unsere personen belangt,

wöllen wir mit allem ernst anhallten, domit wir contradiert

und bzallt werden, derhalben so pitten wir e g e w gantz

underthenig die wölle uns in diser und andern fürfallenden

sachen alle zitt gnedigklich und vatterlich für bevolchen haben,

und ir fl dhl zuschryben domit wir erlicher gestallt unser

zallungen halben beser gehallten wurden, wz dan e g

e w uns witter bevelchen mächt, wöllen wir söllichs nach

bestem unserm vermögen ia auch schuldiger undertheniger

pflicht verrichten, thuond heimit e g e w in schirm

Gottes und Mariae thrüwlich bevelchen. Dattum in Thurin

den 14 Novembris a 1594

e g e w

underthenigister burger

Balthasar Pfyffer

Walthart am Rinn

Heinrich Kloos