Min gantz fründtlich gruss...

... Uss byligendem

proces, sampt darneben vergriffner uffgenomner schrifftlicher

khundtschafft, hatt u g e w abzunemen, welicher gestalt

ettlich ampts, und kriegslütt, so under h Herttenstei-

ners fendli mines regiments im dienst gewesen, one

urloub, und passportten, vom regiment gezogen, ouch

was sy darneben veranlasset haben. Diewyl mir dise

sach wider unsere kriegsordinantzen sindt, han ich nit

fürgan khönnen, u g e w dessen zuberichte, es

wird aber houptman krafft, der zu üch reisset

u g e w wyttlöuffigem bericht khönnen erzellen,

dem pitt ich glouben zugeben, hieneben wo ich hoch

gemelter u e w in fürwallenden sachen dienen

khan, hatt dieselb mich ieder zytt so willig, alls

pflichtig zufinden, Gott gebe mir gnad darzu, den

ich pitt, sampt siner würdigen mutter Mariam,

sy wellindt hochgemelte u g e w in glückseligem

regiment erhalten, nebend mittheilung eines glück-

seligen nüwen iars, Darum 28 ianuars, 1595

U g e w

guttwilliger diener

und mitburger

Sebastian Heinrich Cun, ritter

im namen gemeiner houptlütten

underschriben

(2 anderes Dokument von anderer Hand)

Khundtschaff uff gnomen fritag nach pauli bekerung von wegen

des obristen profossen Hans Fryens und wachtmeister

Staltter von Lucern

Erstlich zügt fentrich Nicklaus Wirtz by seinm eidt

da der wachtmeister sige von sant Ranburg komen, habent sy mit

ein andern geschen da habe er der fentdrich den wachtmeyster

gefragt was nüws sige hab der wachtmeyster anzeigt Beruhsa (?)

sige belageret, und man beschiess mit den grossen stückhen

dar uff hab er der fendrich geret ich han vermeint man welle

uff burg zu zühen da habe der wachtmeyster gerett, wan

ihr über den pass oder gen burg komen, will ich disser oder

iennes thaun (etzetra). Da sige das geschrey wider die knecht

komen, und den in willen gemacht, hab auch witer geret

der wachtmeyster wan man nit anderst kriege meer (?) wie

byss har so werde es gan wie for fünff iaren im unselligen

krieg bezügt auch witter das der obrister brofoss habe geret

der her obrister von Herttenstein sige nyt by inen und der

lütten ampt zeige an er sige nit hauptman er sige inen

nüt schuldig.

Witter bezügt Balthasser Ratzenhoffer by seinm eidt

es habe sich zu trage zu wien da der leenma sige geschin (?)

habe man söllen under allen fendtlaus (?) 30 man über das

wasser schickhen do habe der brofoss und wachtmeister nit

über wellen, da sige der lüttenampt profoss und wacht-

meyster an ein andern komen, mag aber nit wüssen mit

was worden, dar uff sige der wachtmeyster zu inen in des

fluckhen herberig kommen, und anzeigt der lütten ampt habe

geret er sige nit ihr hauptman, er sige ein diener so woll

alls sy dar uff haber der wachtmeyster geseit zu inen wen

dem allso sige so well er nit mer dienen sonder uff den

6 monat zalt sin und heim züchen, do sig also das geschrei

under die knecht komen, sy beid aber der wachtmeyster und

brofoss sigent alle zitt zu Wien mit ein andern zu radt

gangen, in einen gernen, und wen er der Ratzenhoffer sige

darzu komen, sy geret du flatierer gan von dhanen.

Witter bezügt Hanss Fluck der margitant by sinem eidt

wie obstat.

(3 Neues Dokument)

Den 20 tag november sindt welche kriegslütt von dess herrn

obristen von Herttenstein fendtli in gefangenschafft komen

von wegen dass sy sich uff geworffen unter dem lütten

amprt forttman des halben her obrister und gemeine haupt-

lüt etliche lassen in gefangenschaff legen und durch herren

obristen richter lassen erduren, daruff habent sy folgent

bescheidt geben. Namlichen das sich die ursach, das die amptslüt

nit lenger heigent wellen dienen sonder von inen gefaren

syent und sy durch die amptslüt verstandten das sy heigent

wellen zaltt sy, habent sy vermeint die knecht wellent auch so

woll zaltt sy alls die amptslüt und nit drigss kriegen wie

aber for mer beschechen ist, und das sig die ursach und der anfang

das sy heigent wellen von dem lüttenampt uff die 7 monat

zaltt sy wie woll sy er noch nit verdienet und der lütten-

ampt es vom fürsten nit empfangen, wie dhan uss volgenter

kundtschafft genugsam ab zu nemen (?), wer ein ursach an dem

dumult so geschen ist

Hans Haffstetter (?)

Grichtschriber