Edlen vesten, frommen, fursichtigen furnemme ersamen

unnd wysen, innsonders gnädig lieb herren und oberen,

uch syend zu allen zytten min gutwilligen diensten

sampt schuldig pflicht bevor, unnd fügen uch hiemit

zu vernemen, das wir abermalls durch ein ruch

gebirg gezogen, unnd ietz inn einer statt vier

myl von Avinion liggen genannt Carpantress

an spys und tranck gantz kein mangell haben,

daselbs wir dr bezalung wartend sind, und

so bald wir die empfahen, uff hispaniani zu

vorrucken wärden, wann der künig sinn

willens sin krieg und zug inn hispaniani

zu vollenden und fürzenemen, dess halb

ist an uch min gantz fründlich bitt ob ettlich

knächt heim louffen wurden, mich oder ander

houptlut zu verclagen, inen nit glouben zegäben,

sunder mich oder ander ander, mit siner zytt

unserer antwurtt ouch vernemen, es haben ouch

gemein houptlut, gemeiner eydtgnon botten, ein

copy der ordinantz wie die knächt, die geschworen

zugesandt inn hoffnung uch die nit missfellig

wärde, darum ob etlich von uns ane passporten

louffen wurden, ir nach der gepurt darin

handlen mogen, es wirdt ouch der bott so

nochstmalls von uns zu uch komen wirtt

allerdingen bas bricht zu bringen, mit bitt ir

wellind ouch allzu berichten, wie es um und by

uch stende, mich ouch darby allzeit inn güttigem

bevelch haben, datum zu Carpantress bin letsten

tag julii anno xlii

uwer allzeit gutt

williger

Houptman Hans Birchro