Hochgeachte, edle, gestrenge, nottveste, fromme, fürsichtige unnd

wyse, hocherendiste gnedige herren obern und vätern, eürer gestreng

ersam wysheit seyend unser underthenige gehorsamen willigen

dienst und gruoss zuovor.

Es zwyfflet unns nit e g e v sye etlicher gestalt bericht, wie

wir mit der hilff Gottes die strenge veste Cavor ingenommen

unnd erobert, volgents auch unseren feldt vyend allerdingen uff

dismaln uss dem lannd vertryben unnd veriagt haben.

Was das unser bezalungen beträffent, welche sich zuo einer

grossen summa gelauffen unnd gemeert, also das unns ir fl dht (?)

zuo Savoy unnd volgents rü cath M. zuo hispanien bis inn

die achtzig tusent kronen schuldig werden, haben wir uss tringender

nott nit umgehen könden, by e g e w unns etliche masen zuo-

erklagen, das wir bishar zuo keinen rechten zalungen kommen

mögen, sonder stets mit guoten worten unnd vil versprechung uf-

gehalten worden, wie das e g e w meermals zuogeschryben,

unangesächen wir hierzwüschen unns inn aller sachen, wie es

redlichen kriegslüten unnd frommen eidtgnossen zustat, bruches

lassen, verhoffen auch unsers getrüwen dienst von ir fl dht

gerümpt, glichfals by e g e w wol zuo geniessen haben.

Derwegen wir uff solche unsere grosse beschwerden dismaln nüt

bessers nach wytters zethuon gewüsst, das e g e w söllichs

durch unsers hierums abgesanten getrüwen leiben heren und

mithauptman Walthert am Rin von Luzern zuerschinen lassen,

dessen muntlichen unnd wyttleüffigen bricht e g e w

gnediger audientz unnd glauben geben wöllen.

Wir haben unns auch entlichen fürgenomen unnd entschlossen, inn

keinen zuosotz noch wider den vyend hinzwüschen ferner zubruchen lassen

(2)

sonder strackh nacher Turin zuoziechen, alda nüwers gnedigen und

vätterlichen bescheidts zuowerwarten, welchen wir verhoffen unns

gnedigklich unnd unverzogenlich zuokommen werde.

Langt derhalben an e g e w unser gantz underthenige dienstlich

pitt, dieselben wellen unns inn diser hochangelegenen sach ge-

thrüwlichen unnd vätterlichen beholffen sein, unndt fürderlich

gedanchten unseren lieben herren mittbruoder am Rin abfertigen,

wie das wir der trostlichen zuoversicht, ir nüweren gnedigen

unnd vätterliche handreichung thuon werden, damit unsere

erliche kriegslütt nun mher umb ire verdiente besoldung befrydigt

unnd iren wyb und kinden geholffen werde. Was das ir

unser gnedige herren unnd obern unns hierinnen wytter bevelchen

unnd heissen werden, wollen wir demselben uss schuldiger unnd

undertheniger pflicht nach bestem unserm vermögen flisig nach

komen, thuondt hiemit e g e w inn göttlichen schirm und

für pitt Mariae trüwlichen bevelchen. Datum Turin den 13 Mai

A° 1595

E G E W

Undertheniger gehorsame