Unsern günstigen..

Wir hand mit sonderm gfallen angehört und ver-

standen das ir letstlichen umb üwere usstende kriegs-

zalungen wol vernüegt und bezallt syent worden darumb

dann wir uch hiemit ermant wöllen haben, das ir nun

angendts und unverzogenlich üwere ampt und kriegslüt

dahin halltent und vernuogent das sy by leogari wocken (?)

unnserem statt louffer (?) oder andern gelegenheit nun auch iren

armen wyb und kinden gellt himbdschickend damit

sy sich desto bas erhallten und uss irer armut erledigen könnent

und mögent. Wir wöllent hiemit auch uch gantz ernstlich

vermanet und gwarnet haben, ir nun in künfftigem uff

üwer zalungen besser uffsächen habent, üch monatlichen mustern

unnd zallen heissent. Damit sich solliche üwere zalungen

nit wie in vergangnem meerent und huffent und ir hier-

durch üwere kriegslüt in desto besserer ordnung erhalltent ir

auch desto flyssiger dienen mögent. Habent wir üch hiemit

vätterlicher wolmeinung zesinn gelegt, unnd üch berichten wöllen

thuond üch unnd unns damit Gottes und Mariae schirm

thruwlich bevelchen. Datum 26 tag howmonats

A 1595

Schuldtheis und raath

der statt Lucern