Alls dann Hanns Heinrich Schüpffer von Hasenhusen

uss Sanct Michels Ampt pürtig von eines groben

angefangnen uffrerischen tumults under den gmeinen

kriegsknechten im vergangnen niderländischen kriegs-

zuog dardurch er nachlichen gmeine obersten haupt-

unnd kriegslütt in gfaar lybs, unnd läbens gebracht

in Mgh gfangenschafft komen, darum dann nach

form rechtens ordenliche kundtschafft uss unnd ingenommen

worden. Daruff dann er der sachen mi allem

erst in gfangenschafft erduret unnd befragt

worden, da er dann der sachen nit absyn können

sonder aller sachen wie die kundtschafft zuogibt

gichtig und bekandtlich gsin. Habent Mgh raäth

unnd hundert uff hütt über solliche sin handlung gerichtet

unnd nach verhörung aller sachen kundtschafften, siner

vergichten auch der fürpitt siner kleinen wyb unnd

kinden, auch gefründten und verwandten demnach

h Probst unnd Cappitels auch einer gantzen

burgerschafft zuo Münster, dessglychen amptslütten

dess gantzen Sanct Michels Ampt sich erkennt wie-

wol Mgh gefüegt gsin wärent über sin lyb, unnd

läber zuorichten, habent Mgh doch angesächen die

fürpitt, unnd ime auch sinen wyb unnd kinden

das läben gschenckt, hieneben erkennt das er

eerlooss und wöörloss syn, hiemit zum h Jesuiten

gan gan bychten, unnd sin atzung und kosten auch den

h hauptlütten allen iren hierum erlittnen kosten

abtragen.