Hochgeachter edler...

Davon wyr den uwer gestreng ersam

wysheit so lang wir unsser sachen (?) der

zallungen, halben kein bericht dan, ist

allein die ursach dz wir von tag zu tag

unsser spedition gewertig warendt.

Also wir aber ietz biss in dry wuchen lang

zu Meilandt verhart, und nit gemanglet täglich

ussere zallung so uns unlangest ist versprochen

gsin, nit gemanglet zu solicitieren, thun nun

uns ledstlich 33000 kr zegeben anerbotten

den übrigen rest in zweyen manaten

voletz zu erlegen, welche suma wir aber

by wittem nienen genugsam unsser knecht

damit zu bezallen finden mögendt,

welches wir ouch herrn Contestable geklagt,

unsser beschwerlichkeit anzeige, ist uns witer

von ob gemeltem herrn, ge andwort worden,

dz ir exelentz, welle üch unssern gnedigen

herren und obern, har umb zu schryben,

und verhoffe bie u g e w so vil zu erhalten

dz u g e w uns gegen den knechten

dissrer zwen monat werdent schirm geben

bis wir ouch har imb bezalt syendt

(2)

wellchen allen wir aber nit könen

noch wellen glouben, sunders dessy

u g e w mit dissem schryben

berichten wellen, mit underteniger

bitt u g e w welle uns über

vätterlichen radt und meinung unfezögenlich

ze wüssen machen, und uns in allenn

sachen was zu fürdrung unsser zallung

so wir ietz ein lange zytt usgestanden

vätterlich (wie dan u g e w wolunthrun (?)

lassen bevolchen sind, damit wir auch

ein mal möchtendt unsser sach an ein

endt khomen. hiemit wellendt wyr

u g e w dem schirm Gottes und

gedrüwer fürbitt Maria bevolchen haben

die wellendt u g e w in lang

wiriger gesundheit und glückseliger

reierung erhalten. Datum Meillands

den 13 jener a 1596

U G E W

underthenig gehorsamer

Obrister und gemeine

hauptlüt im Piemont