Item es ist zü wüssen wie das der from ersam
Jost Zinc genn im Hapspurger ampt im Lucern-
biett und begert ietz vonn unnserem beden nüw
und alten richter zü Schötz und ver willigett werden
kuntschaft uff zü nemenn namlich der richter
Meirat Disler der nüw richter der allt richter
Lerennz Hunckeler bed zü Schötz zum erstenn clagt
sich der güt Jost Zincgen wie man gemusteret
hat so hatt mann ienenn ein küngisthenn daller für
einn kron mynder iiii ss da hand sy vermeinndt man sölli
sy ouch bezalen wie die anderenn hauptlütt zum anderenn
hatt man uns in sechs wuchen nie kein gelt gäbenn
da sind wir ouch zum obersten gangenn und allei kriex
lütt einn helig gsinn und ein red under denn knechten
witer zum dritenn inn der stat Thüri wie die knechtt
nytt mer hend wellen dienenn da hatt man inn uss
erwelt gehonn und zum öberstenn geschickt öb mann inenn
gelt geben wettei oder nyt do gab der her oberist gütenn
pscheid er wellei geltt und pscheid bringenn nun zum
fierten inn der stat zu heüw (?) da syend die knecht
zü ratt wordenn öb man zienn wellei oder nytt da sind
sy zü ratt worden wo des öberstersten fänli des her
haupttmann Schürpfenn fäntli hinn ziechei so wellendt sy
ouch (?) nacher zeichenn nunn zum fünfftenn so plagenn sy
sych fast übell das sy gernn heten wellen dienen wie
es denn kriex lüten zimpt und gebürt so hend sy nit
mer welen lasenn und innenn denn apscheide gänn und ouch
heim gschicktt hie zü zügenn und kuntschafft und synnd
unnd synnd kuntschafft namlich Hans Blunsch und
gitt kuntschaft Hans Bentz bed zü Schötz vor denn beden
richterenn zü Schötz inn der graf schaft Willisouw.
Datum donstag vor Michelli 1596 iar
(2) [Neues Dokument]
Ich Johann Schuffelbül der zytt schulltheiss zuo Surse
im Ergäw bekenn und thuon kundt mitt diesem brieff
das uff hütt sines datums vor mir erschinen der
ersam Jost Zing von Meggen uss Hapspurger ampt
und anzeigt, wie das sich etwas gspans und missverstandes
zuogetragen zwüschen ime und herens houptman Batt
Fleckenstein, des sy sich güttigklichen nit verglichen können,
deshalben ime kundtschafft der warheitt hochlichen vonnötten
sige, mitt underthäniger pitte welle ime solche zuofürderung
der warheitt nach form rächtenn verhören lassen. Also
in ansühung siner pitte die mich der billichkeitt gmüss sin
bedunckt, und solches anbringen niemandem versagt sol
würden, ich ouch zügnis der warheitt zefürdern schuldig
und gneigt hab ich nachvolgende personen uff irn
gechenn eydt verhörn lassen.
Erstlich zügett Geörg Vogler unser ynwoner als
sy nächst und letst verschinen im kriegszug inn
Niderland gsin sigentt, heigentt die houptlütten
inen sächs wuchen lang nie kein gält geben, heigentt
sich uff den puren behelffen müssen, und da sy
inen gält gäben, habentt sy inen die ersten zwen
monatt fünff halb francken alwägen für ein kronen gäben
demnach an solcher yeder kronen ein kostantzer batzen abzogen,
sige der verlust an yeder kronen acht schilling zwen angster
gsin. Zum anderen sige ime gentzlichen nützitt bewüsstt
das er Jost Zing einicher knächt uffgwyssen habe sich
den houptlütten widerspänig zuo erzeigen. Zum drytten
sigentt sy die knächt und er Jost Zing einhellig worden
mitt des heren houptman Schürpfer fendli zuo züchen
wohin es züche, heige hauptman Batt Fleckenstein
dem Jost Zinggen und sinem gspanen Jacob Gärwer
daruff geurloubett, diss sige ime bewüsst.
Item Hans Schwägler (so man nempt Pfennig) zügett
äben dis das inen in sächs wuchens kein gält worden
und demnach die ersten zwen monatt 24 batzen und 2 angster
für ein kronen gäben habentt. Und das ime gentzlichen
nützitt bewüsst er Jost Zing einichen knächt sich widerspänig
zuo erzeigen, uffgwicklett hab. Und letstlich die knächt einhellig
worden sigentt mitt dem houptmant Schürpfen wohin er
züchen thuon, zuo ziechen, sige Jost Zing und sin gspan Jacob
Gärwer daruff geurloubett worden, diss sige inen zuo
wüssen
(3)
Und das zu waren urkundt hab ich obernampt
Johan Schuffelbül schulthes zu Surse disem brieff
mit einem eignen stentt und insigel verwant
gäben uff mitwochen vor S. Michäels tag
Anno 1596
(4) [Neues Dokument]
Wyr der schultheis und rhatt zuo Wyllisow erkennentt uns offenlich
mitt disem brieff das uff hütt sines dattums alls myr inn
rhattswys by ein anderen versamptt gwessen vor uns erschinen ist
der erbar und bescheiden Jost Zingck von Meggen mitt anzeigung
wie das er kunttschafftt der warheit gegen und wyder houpttman
Batten Fleckenstein nottwendig mit bitte ime die durch unseren
statt schriber nach form des rechttens uff und inn zu nemen,
und gschriffttlichen zu vergenen (?), welches wyr ime zu fürdrung der
warheit gern zu glasenn alls harnach ervolgtt.
Uldrick Zeller unser mittbürgger redtt und erzügtt harum by
sinem gethanen eydtt, das als si mitt denen houptlütten ins Nider
landtt sygendt zoggen habe man inen gar wenig geltt under des
Fleckensteins fendli geben und inn syben wuchen habe man innen
kein geltt nitt geben allso das die knecht dröschen müesen den
buren das sy sich müggendt erhaltten und wan man innen
schon geltt geben habe so habentt si innen das gelt fyll dürer
geben dann es gältten habe da syendt ettliche knecht zu samen
gangen und gratt gschlagett wie si der sachen thuon wellendtt
under des Fleckensteins fendli, da sye der Fleckenstein
und houpttman Jostt Gerbell zu gfaren und inne Jost Zingen
und ander mer lasen innzüchen und inn isen schlachen lassen
vermeindtt sy wigklentt die knechtt uff das si hinwegg
louffendtt welchs aber gar nitt gsin sye alls habentt sy
die knecht lang nacher gfüertt und sy für das recht stellen
wellen zu letst habentt sy si wider ledig glasen und
geurloubett und mütt für gstelt den si habentt nütt uff si
beriggen (?) möggen. Witter wüsse er nütt.
(5)
Barthollemeus Gschan (?) zügtt glicher gstaltt alls Uldrich Zeller den er ouch
under des Fleckensteins fendlin gewessen - sunst sye ime nütt
witters zu wüssen.
Und des alles zu merer zügnüs si Hanss Adam Peyer der zitt
schultheis zuo Wyllisouw ime disern brieff mitt einem eignnen
uffgetruckten secret innsigell verwant und geben lasen mir
und minen erben inn allwegg one schaden der gelenn ist
donstags vor s. Michaells dag anno 1596.