Uff andingen mgh und gebott he

raathsrichters Laurentz Wirtzen ist

nachvollgende kundtschafft gegen und

wider der krieger

Hans sonst genannt von Nüwenkilch

uff und ingnomen worden uff don-

stag vor Michaelis A° 1596.

Herr Hauptman Bernhart Bodmer von

Baden bezügt das diser krieger

Hanns von anfang des kriegszugs

stätts trutzitz, und unruewig sich erzeigt

und gehallten habe, sonderlich

h Balthasar Pfyffer sinen Mittgspan-

en jederzytt mit schmutz, unnd schmach

wortten angetastet. Insonderheit aber

alls sy in das Savoy züchen söllen

sye er der rechten Uffwiglern einer

gsin, und von irer gantzen gsellschafft

zum hauptman geben und uffgeworffen

worden, unnd alss sy die hauptütt

zuo inen disen widerspänigen knechten

komen, sye er der fürnembst gsin

der sich am unrüewigisten erzeigt, die

andern an unnd uffgewisen sich keins

wegs zubereden lassen unangesächen wie

man inne gestowckt, unnd abgemanet

sinen hauptman Balthasar Pfyffer

ein kleins lumpen mannli genamset

(2)

und er sye nit wärtt das er ein

hauptman syn sölle, unnd das sy ime wytter

dienen söllent, wöllent ime auch gar nit

meer dienen mit vil anderem trutzigen

bochen, unnd tröwen allso das er züg

schier ein gantzen tag davon zureden

hette wie er und die überigen sine

mitthafften (deren er wie obgehört

der hauptman gsin) sich in dieser unruow

unnd tumult gehallten habent.

H. hauptman Heinrich Kloos bezügt eben-

mässig, unnd umb so vil wytter das er

insonderheit disen krieger Hannsen

fründtlich stöwcken, unnd abmanen wollen

er aber ie lenger ye touber worden [am Rand:

und auch mit söllichem groben bescheid inne angetastet] allso

das er wol befüegt gsin wäre wo die

sach nit allso beschaffen wäre gsin, ime

sinen verdienten lhon zuogeben, sonderlichen

haber er auch h Balthasar Pfyffer

ein fuls verlogens mannli genamset

unnd geschollten, und er wölle darum

heimfaren damit er der gfaar ent-

rünnen könne. Lettstlich habe er

sy gmeine hauptlüt geschwächt unnd

geredt, sy konnent nit dahaar wie

eerlich hauptlütten zuostande.

(3)

H. hauptman Walthert am Rhyn bezügt

das er zwar nit by disem uffrur unnd

tumult gsin, habe aber offtermallen von

h obersten Lussy gehört, das dieser

Krieger Hanns in disem uffruor der un-

rüewigest, unnd fürnembst uffwigler

gesin sye, ia auch den gantzen krieg

sich unrüewig erzeigt unnd gehallten

habe, allso das ime unrecht bescheche

wann er ime nit sin verdienter lhon

werde.