Kundtschafft wider Hanns Huobschmid
sonst genannt Krieger Hanns uffgenomen
uff zinstag vor Leodegary A° 1596.
Herr oberster Caspar Lussy von Under-
walden bezügt nach dem er
der lenge nach erzellt wie sich dise
mietery tumult unnd uffruor im verschinen
piemontesischen kriegszug erhept, unnd
zuogetragen das er zwar nit wüssen
möge ob diser krieger Hanns oder
wölliche andere diser mietery urhäber unnd
anfänger gsin sye oder nit, dann wie
ime die sach fürkomen, habe er sich
höchlichen verwundert, unnd die hauptlütt
dennächsten beschicket, sy gewarnet das
sy sorg und guott uffsächen habent damit
inen nit ettwan von den knechten dess
orts schand unnd schmach begene, die
hauptlütt aber sich einer söllichen sach
keins wegs nit versächen. Alls nun
die fendlin fort ins Savoy züchen
söllen sye ime obersten anzeigt worden
das die knecht under hauptman
Balthasar Pfyffers fendlin zusamen
geschworen unnd vereinbaret das sy diss
fendlin nit fort züchen lassen wöllent
daruff er für die herberg, da diss
(2)
fendlin gelosiert gsin, geritten den fend-
rich mit dem fendlin hinab gevordert, die
spiellüt daruff schlachen heissen, unnd
zuovor die knecht, wölliche die herberg
umbgeben ghan, mit ruchen worten ernstlich
angeredt er wölle gern den mann
sächen wöllicher das fendlin wider eydt
unnd eer nit wölle fort züchen lassen,
unnd alls er daruff den fendrichen mit
dem fendlin unnd die spillütt fort
züchen heissen, sye nit meer dann einer
wöllichen man ime anzeigt Hanns Eickart
von Willisow gsin sye, der uffgeschrüwen
wüssent ir nit war ir thun söllent warum
gryfft man nit zum fendlin, doch sye
das fendlin, unnd glych daruff die überigen
fendlin alle fort zogen, unnd habe er
anders nit vermeint dann die knecht
diewyl sy den ernst gesächen wurdent
all nacher züchen, wölliches aber nit
beschächen, sonder habent dise uffwigler
mit iren mitthafften ungehorsamen
uff ein nüws sich zuosamen than unnd
vereinbaret, unnd heimmzüchen wöllen
allso das sy schon schier ein tagreyss
fort zu rugck zogen. Alls er nun
sölliches vernomen, habe er mit sampt
den hauptlütten von dem herzogen hillff
begert, unnd disen knechten uff der stätt
(3)
nachgeritten sy zuo Selte bezogen, unnd
alls sy zuo inen komen, habe er sy
demnächsten angeredt, uss was ursach sy
sich wider eydt unnd eer so ungehorsam
wider ire hauptlütt uffgeworffen
da demnächsten die urhäber unnd an-
fänger, wie er dann dieselbigen
für andere nit hallten könne, unnd under
denen diser Krieger Hanns auch einer
gsin, mit so grobem bscheid sich gegen
ime unnd den hauptlütten mit schmütz
und schmachworten sonderlichen diser Krie-
ger Hanns [am Rand: mit siner hallenparten] so ungebürlich erzeigt, unnd
gehallten ungesächen wie er oberster
understanden sy zuobegüetigen, habe doch
sölliches kümerlich nützit versachen
mögen bis nach langem sy sich ergeben
dann er oberster sonstn mit den
hauptlütten endtlichen entschlossen gsin
inen iren verdienten lhon zuogeben.
Es möge wol syn das er disem
Krieger Hannsen [am Rand: sinem fürgeben nach] damallen under sin
fendlin zenemen versprochen, könne
aber sich nit erinnern, dann er
ime unnd andern sins glychen was
möglich gsin wäre sy zu begüetigen ver-
sprochen hette.
Sonsten sy diser Krieger Hanns verschinen
samstag zuo ime gan Underwallden
komen, siner zügknus und fürgeschrifft
(4)
begert. Er inne bescheiden er morn-
dess sontags wider zuo ime komen
sölle, wölle er ime ein schryben geben
in wöllichem er mgh berichten
wölle war er sinthalben wüsse, er aber
sye nit wider komen, sonder on das schry-
ben hinweg gangen.
So dann was belangt Josten Thürler von
Horw bezügt er h oberster das diser
Thürler uss Languedocken zuo
sinem regiment komen under inne
dingen wöllen aber mit ime zerschlagen
doch under hauptman Meyer von Fry-
burg gedinget, unnd allso ettlich monat
lang under sinem regiment gedienet
vollgendts von sinem regiment in den
zuosatz in Phrigorast [am Rand: zuo irem vyend] gedinget, ettlich
meer mit ime löchen und nemen wöllen
lettstlich alls man Prigorast ingenomen
habe er sich heimlicher wys hinweg
gewagt, sonsten er uff inne sächen
unnd ime sinen verdienten lhön wöllen geben
lassen. Vor ettwas wuchen habe er
inne zuo Horw im wirtshus gesächen
darab er sich höchlichen verwundert das
er sich allso hie umbher dörffe finden
lassen, und daruff der handel h
Buwmeister von Mättenwyl, der damallen
auch daselbs zuo Horw gsin, anzeigt.