Alsdann vor etlich tagen Hans Hubschmid genant Krieger Hans, umb das

er in vergangem piemondtesischen krieg, die knecht wider ire hauptlüt

sölte uffgewiglet auch sich gegen synen hauptlüten trutzig und ungehorsam

erzeigt haben sölte in m g h gefangenschafft kommen, diewyl und aber

er uff ernstlich erduren und fragen gar nit gichtig syn wöllen, denn allein das

er auch mit den übrigen uffrüerigen knechten vom regiment hinweg gezogen,

ia er allwegen die knecht abgebrochen und gemanet sy gedult tragen sölent, und

starck daruff beharret, habent in m g h uff hütt uff ein gwant (?) urfeehd

ussgelassen soll syn atzung und kosten bezalen, und sich still und rüewig halten

dann m g h uff inne ein uffsehen haben werden, und nach dem er sich haltet

nach demselben werdent sy ime auch lohnen, iedoch wyl er h hauptman

Balthasaren Pfyffer höchlich geschinächt (?) und getrutzet haben soll, dessen

er nit gestendig syn will, ist bemeltem h hauptman vorbehalten, so

er nit entbären will, ime Krieger Hansen dessenthalben widerumb

in recht zefassen.