Uff ein ernstliches und pittliches schriben des hern Petter von Wilette
fürstl dht hertzogen in Sapfoy ordenligen ambass in der eidgnoscht
in namen wolermelden fürsten ein uffbruch von acht fendlein, von
m h lutt und in ansehung der habenden und ehrlichen pünttnus sine
landt hierduch zue schützen undt schirmen angefordert undt begert,
hgand m h erkhentt und den selbigen ufbruch einhelligkhlich erlauptt
lutt der pünttnus, und allen billigen capitulation, so mit den obersten
und houptlüten mag ufgricht werden, dabey ouch erlüteret das
den kriegslüten alwägen für ein krone ein dacaton geben werde, oldt
so vill müntz undt gelt wie in denen orten undt enden da man geltt
usgeben undt empfahen wirtt es sige in dem vatterland old anderstwo
geltten und bringen mag undt sellendt die obersten und hauptlütt
minen hern dz hüttig morgenbrodt zalen.