Uff andingen unnd gebott h landvogt Luw-

wig Schürpffen ritters stattfendrichs ist

nachvollgende kundtschafft antreffend Joseph

Schürman zuo Wylistatt darum das er nit

recht zächendet hatt, uffgnomen worden

smastags vor letare A° 1599.

Weibel Hanns Thaman bezügt das Hanns

Huobschmid sonst der Krieger Hanns genannt

zuo ime komen, unnd ime klagt wie das

er unnd Joseph Schürman by einandern

in einem spycher ettwas gethreids ghan

da es fälen wölle, dann er nit meer so vil

finden könne, wie er aber vermeint es

gsin syn sölle, könne nit fürkomen müesse

inne Schürman darum anlangen, daruff

er züg inne ermanet sölle sonst lugen

das sy sich güetigklich verglychen, er Krieger

Hanns vermeint könne es thuon, in dem er

züg allso zbest zur sach geredt lettstlichen

Krieger Hanns vermeldet er wüsste noch

wol ettwas meer, wölle aber desselbigen

geschwygen, er sich aber zlettst nit

meer enthallten können, dann das er

vermelldet, unnd anzeigt es habe an ettlichen

garben gfällt, das Joseph Schürman

nit recht zächendet habe, und wyl er züg

(2)

nun sölliches ghört, unnd Krieger Hanns

sölliches auch zuo Sursee ob einem tisch

voll lütten von Schürman ussgeben, habe

er nit fürkomen können sölliches dem

h landvogt zuleyden, unnd anzuozeigen.

Demnach alls sy beid für das gricht gan Roo-

tenburg gwöllen, und in sin zügen huss die kundt-

schafft vom Bremgarten uffgnomen, habent [Rand: sy darzwüschen

stätts mit ein andern balget lettstlichen der

Krieger Hans den Schüwrman in syn keller hals abhin geschlagen]

Felix Huober uss dem Russwyler ampt

bezügt, nach dem sy Joseph Schürman, unnd

der Krieger Hanns den berg zächend

dem Gottshus Muri gehörig mit einandern

empfangen, unnd denselbigen zuosamen in

ein spycher gsamlet wüsse er züg gar

wol das sy in disen spycher gethan habent

an korn und haber glych vil das es

anderhalbs unnd zwentzig mallter beider-

ley gsin, unnd damit sy nun widerum zum

määs komen könnent, habent sy daryn für-

gschüttet an korn 5 mütt unnd an haber

iiiii mütt. Wie sy nun diss gethreyddt

widerum uss dem spycher gmässen

habent sy an korn nit meer fürfunden dann 3 fl (?)

da sy aber 5 mütt fü inge-

schüttet ghan allso das sy ein mallter

unnd ein fl hinter unnd weniger funden

unnd an haber habent sy hinder, unnd weni-

ger funden sampt dem was sy für ingschüttet

ghan überal - ii mallter, allso das

es an korn und haber weniger gsin - 12

mütt i fl.

(3)

Was nun belangt die zächend garben da habe

er züg unnd syn gspan harnach beschribner

züg [Uli Schüepper] zuosamen bunden, uff unnd uffgstellt

erstlichen in einer weid 90 [thuott 9 zächend], in der

andern - 300 [thuott - 30 zächend], demnach uss andern

güettern nach darzuo gfüert - 6 garben

das thuott zuosamen - 45 zächend

garben so dann Uli Schüepper habe

inen zuosamen gsamlet überal - 65 zächend

garben, das thuott beider samen - 110 gar-

ben. Allso sy nun dieselbigen - 110 gar-

ben ussher tröschen wöllen, so in Schürmans

schüwr gelegt worden, habent sy nit meer

funden nach dann - 90 garben, allso das

20 darvon komen wärent.

Uli Schüepper uss dem Russwyler

ampt bezügt was die zächend garben

belangt glychermassen wie vorbeschribner

Felix Huober, von dem gethreyd im

spycher wüsse er züg nütt.

Jacob Bremgarter der müller knecht ietzt

im Entlibuoch bezügt, was das gesamlet

gethreyd in spycher belangt glychermassen

wie Felix Huober obgenant.

Was die zächend garben belangt wüsse

er davon nütt wie vil sy ingsamlet, aber

wol das sy nit meer dann - 90 funden wie

sy dieselbigen ussher tröschen wöllen.

(4)

Maria Grütter syn Schüwrmans gewessne

dienstmagdt bezügt, das Schüwrman

sy zun zytten auch gheissen die zächend

garben in thrüwen uffstellen, wölliches

sy allwegen in thrüwen gethan habe. So nun

ettwan dess andern volcks nit recht zächendet

davon wüsse sy nütt.

(5 anderes Dokument)

Ich Joannes Thamman Weybel im hoff Adelwyll

bekhenne unnd thuon khundt hiemitt diserm kuntt-

schafftt brieff das für mich ist konn der ehr-

sam unnd bescheiden Hans Huobschmid und anzeigtt

wie das er kunttschafftt der warheitt mangel

sige von wägen eines gespans und stoss so er heige

mitt Joseph Schürman zuo Wyllistatt von wegen des

zendens so sy mit einandern geheptt. Nun so heige er

ietzunder der Hanns Huobschmidt vermeintt es sötte

ein guotten theyl für gsin sy es sötte imme ettwann

ein maltter oder ettwans für sin theyl ussen worden

sin do wie sy in ietzunder wider heigen sollen uss-

en fassen do heigend sy fier thalben mütt hinder

funden das sy nitt heigendt mögen zum mäs kon

das züge er ietzunder ann Jacob Bremgartter

dem ich Hans Thamman bin sim eidt gefragtt

und ermanett han das er anzeige unnd rede

was im umb die sach zuo wüssen sige da hatt

er anzeigt und gesprochen er heige zähen tag

gehulffen dröschen unnd heige dz guott kron unnd

haber in Josephs spicher gemässen und heige im fl

lix zerthon do heige er funden fünff mütt korn

und fünffthalben mütt haber mer das sy in spich-

en thon heigend weder sy den zenden empfangen

heigendt das züge er unnd wurde es ouch red-

en wo es hin käme es wer war unsern gnädig-

en heren oder vor den amptslütten es sige im

ouch nit anders zuo wüssen, und aber das

hatt er ouch darbin gerett das das guott zimlich

gerüst sige gsin und so ers hätte söllen in nämen

so hätt mans im bas muss vüst oder er hätte

es nit gnon