Diss ist die ordnung der französischen
pension
Den cleinen räten die ein sytten 18 personen.
Der elltest 250 fr demnach die 5 elltisten darnach
allwegen ieder 10 fr minder, bis uff den sibenden der
hatt 195 fr und dafürhin ieder allwegen 5 fr minder bis
uff den jüngsten der hatt 140 fr.
Und allso hatt es die ander sytt ouch.
Bringt ouch ieder sytten 3360 fr und die summ dess
kleinen rats überal - 6720 fr.
Den amptslüten
einem schulltheissen so am ampt ist 100
stattschryber 200
underschryber 50
grossweibel 40
grichtschryber 30
4 stattknecht iedem 20
4 löüffer, 3 überrüter ieder 10
Sa der empteren 570 fr. Sydhar hat man dem ratssubstitut
xxv fr geordnet uss dem burger stat
Dem grossen rhat 64 personen.
Der elltest hatt 100 fr, und darnach allwegen der
nachgend eins francken minder biss uff den letsten oder iüngsten
der hatt 37 fr.
Thut die gantze summa des grossen rats - 4384 fr.
So dann hört uff der burgerschafft staat 600 fr.
Summa alles dess so uffgetheilt würdt 12274 fr.
Nun gibt aber der künig hieruff iärlich für 1 iar 12335 fr.
Allso schiesst iärlich für 61 fr dz gat an umbkosten und
was sonsten an vacantz und ledig plätzen dafallt das gat
ouch an kosten und was am selbigen noch überblybt fallt Mgh
in seckel heim, dargegen wo an vacantz nüt vorstends
und das so falls an kosten nit glangen möchten müssend
Mgh uss irem seckel nachzühen. Allein wo an
der burger summa ettwas ledigs würdt, da nimpt
an nüt sonder würdt dasselbig allwegen wider uff
ander yntheilt.
So dann hört unserm Jesuiten collegio iärlich 720 fr.
Und dann das iärlich fridgellt in den statt seckel 3000 fr.
Allso thut alle summa was der könig iärlich uff ein statt
Lucern gibt und man ze vorderen hatt 16055 francken
für ieden francken x costantzer batzen.
Es hand wol die königlichen anwällt über das alles
noch noch einen anderen gheimen sonderbaren estat so ouch
uff ein statt Lucern dient. Es hand aber Mgh sich dessen
nütt anzenemen oder zevordern, sonder die frantzösischen
herren ordnent und disponierent damitt nach irem gfallen
und guttbeduncken wem sy wöllent.
(2)
Alls nun die vereinung A° 1597 ussgangen und
geendet und harnach zu ussgendem 1601 iar die
selbige mitt ietzigem könig Heinrico 4. wider-
umb ernüwert worden. Hand syne abgesandte mitt
iedem ort der Eydgnossschaft von diser usstenden
unbezallten iärlich pensionen und fridgellten wegen
sonderbarlich tractiert und getädiget, den catholischen orten
aber (ussgnomen Solothurn) haben sy yntrag than darumb
das sy in vergangnen iarten ir kriegsvolck wider den könig
dienen lassen derwegen sy völlige zahlung nit pretendieren
könnent und ob wol man sich dargegen entschuldiget und die
ursache dargethan, so hand doch die königklichen anwält
daran nitt komen wöllen. Allso da es an Mgh komen
hand sy Mgh für alle dise 13 iaren usstende ansprach
von pension und fridgellt zu bezahlen dargeschlagen
namlich sechszehen tusent kronen allso bar so bald die
vereinung angenomen, und das für dryer iaren zalung
und demnach uff nächste zwe bezalungen so man fürhin die
nüwen verfallenden pensionen zalen würdt namlich
zehen tusent und sibenhundert kronen alls für zweyen
iaren zalung, allwegen uff iedes mal halbe summa
thut de gantze summa für alle fünff iar, (allso hand
sy die französischen herren es gerechnet und abtheilt)
sechs und zwenzig tusent und sibenhundert kronen,
für iede kronen 3 francken gerechnet und die francken
zu 9 costantzer batzen.
Allso hand Mgh uss irem mittel ussgeschossen und verordnet
die übrigsessen und die abtheilung machen lassen was es
sich nun uff iede person (so vil die usstheilenden pensionen
belangt) von räten hunderten amptlüten, dienern
und burgern, lebende und abgestorbne bezüchen
möge, wöllichs dise form ghept das man iedem namen
sine iar vollkommenlich gerechnet iedem nach siner
rata sin völlige summa, und dann (glych
wie die frantzosen von den 13 iaren 8 abbrochen)
iedem ouch 8 theil abbrochen, und gerechnet was
es sich für i iar zogen, darnach was es für die ietz be-
zallte 3 iar antroffen, das hatt man iedem bar
bezallt mit francken rechnung nächstgemellter wärung,
darnach iedem sinen überrest der andern zweyen iaren
ouch gerechnet was ime von selbigen noch hört und ynzezühen
stat, und iedem desselben einen restzedel geben.
Das fridgellt aber so Mgh in ir statt seckel ghört von
disen 3 iaren hand Mgh zu iren handen empfangen
namlich 9000 francken, und stand dann inen
noch uff für die künfftigen 2 iar 6000 franken vom
fridgellt, was aber die pension belangt dz hatt dann
ouch syn rata und abtheilung dise beiden künfftigen iaren.