Hans Heini Saleti, usserhalb münster gsessen ein botnner uss dem

neü ampt dess wybels salettis sun, der im se ertrunken ist,

spricht alls ander zreys sogen syg er alls ander ledig gsellen bis gan

frowenfelt zogen, wan er hab weder wyb noch kind, syge ein dienst

gsell, spricht usserthalb zürich syg ein

würdt heisse Claus Zurlinden, dohin syg in beschydt geben, derselb

ouch rych zewerden bittet min g. h. umb gnad er welle syn

leben lang niemer meer unghorsam syn

Hanns Wyg von Guntzwyl, Hanns Wygen eelicher sund, hat by

syner muotter bruoder gedienet, und alls ander zereyss zogen, syge

er nit witziger gsyn, unnd hinweg zogen aber es sölle im syn

läptag niemer mer gschen bittet min gnedig herren umb gnad

er welle werchen wie vorhin und syn vatter vorab ouch

mynen g h volgen, ist ein lediger gsell hat weder

wyb noch kindt

Jacob Natter von Bosswyl pürtig, Cuonrat Natters seligen

sun, rett alls er gan Bintzen an d kilwi zogen wären iren

xv, die zugent nachts hinweg, by denselben wäre er unnd

hette vil truncken füre allso in voller wyss mitt inen darvon

sy heigent in darzuo bracht sonst hab in niemant uffgwiglet

spricht er welle ghorsam syn, und niemer meer wider min

g h handlen, ist ein lediger gsell,

ist bis gan hornn zogen bittet umb gnadt.

Gilgi Weber von Guntzwyl, Hanns Wäber von Guntzwyls sun

ouch ein lediger gsell ret er syg zogen bis gan frowen-

fellt on bescheydt noch uffwiglen, syg allso über syns vatters

willen zogen, syge iung habs nit übersinnet bittet min g h

umb gnadt, rett er wells syn läptag niemer mer thuon, unnd

ghorsam syn niemer mer wider min g h handlen

(2)

Hans Keller, Hanns Kellers seligen sun von Russwyl, im ampt

Münster, durch Ruodolffen Zaffertten syner muotter bruoder erzogen

rett er hab im Bernnbiet geschnitten unnd demnach zuo syner

muotter bruoders bruoder Zaffertten gedinget, syg er hinderrucks

syn meister und vetter, bis gan Zürich uff syn seckel

zogen, unuffgwiglet, rett er welle es syn läptag niemer

meer thuon, bittet min g h umb gnad, ist ein lediger gsell.

Jörg Wintzerli, Petter Wintzerlis von Richenbachs sun, ist ein lediger

gsell, rett er syg bis gan Frowenfellt zogen, on bescheydt uff syn

seckell, hinderrucks syns meisters, unnd alls min herr ratsrichter

im fürghallten worumb er dem weybel entlouffen wellen, rett

er er hab nit entlouffen wellen, sunder hab ein guotten trunck ghan

unnd mit im (?) louffen wellen, beschyn sich wol, wan alls er etwan

wyt glouffen läg er ins grass wartte bis sy nachin käment

spricht er welle ghorsam syn und niemer wider min g h

thuon bittet umb gnad.

Die so von Ermisee kon, sindt

Hanns Rüttiman von Zug pürttig, gsässen zuo Arnise, rett er

syg ein zimerman, hab wyb und kind, syg gen xv zügen gsin

welltte gernn er hette dissen zug erspart, syg vier

iar zu Ermise gsessen, doch nit wytter dann gan zürich komen

zum kindli, und durch die Hitzkilcher dahin beredt worden

und alls er anfangs nit ziechen wellen, habent sy geredt die uff

der statt ziend ouch und zwen genempt die zogen sygent habe

einen den Jansen genempt, allso syg er zogen bittet umb gnad

er welle niemermer wider min g heren handlen sunders

ghorsam syn.

(3)

Hanns Hertzog von Hertznacht ein lediger gsell, rett

er syg uff syn kosten zogen, on bscheydt bis gan Costanntz

hab sechst iar zuo Ermisee dienet, syn vatter heist Frydli

Hertzig syg im ampt Willisow, da kole (?) er denen zuo Willisow,

bittet min g h umb gnad, er welle ghorsam syn unnd

wider min g h niemer thuon, bittet umb gnad.

Peter Meyer Cuonrat Meyers dess allten weybels zuo

Ermisee sun, rett er syt ein lediger gsell und bis gan

Zürich zogen, und do dannen heim, alls d Hitzkilcher so redlir (?)

hinweg zogen, syg er iung und torechttig und hinweg zogen

dz im in trüwen leyd, bittet umb gnad spricht er welle

uber miner g h bott niemer hinweg ziechen und ghorsam

syn.

Meinrat Trachsler, Rüdi Trachslers sun von Rynach

ein lediger gsell, rett er syg in sym eygnen kosten

gan Constantz zogen, syg im in trüwen leyd, das er nit

ghorsam gsyn, sölle im niemer meer bschechen er welle

hinfüro ghorsam syn, unnd wider min g h niemer me

thuon, bittet umb gnad.

(4)

Ettlicher gefangenen

urfechd uss sant

Michells ampt 1549