Gantz wielige und untertenige dienst yderzitt bevor

von mier George Hartmann auss dem Bürrer

ampt, und Wolfgang Mattler auss dem Rotter

kilchgang, ist unser unterthenigst bitten an unser

gnedige herren und vätter, sie wöllen uns in unser

sachen, und armut behulfflich sein. Nach dem wie

wier, zu Wartzel so wochen lang in dem thurme

gelegen sein, in dem wustesten thurm der gewesen (?)

ist das weder sonn noch monde zu uns geschienen

hatt, und haben dennest (?) nichts andres begeret weder

das unsere, das man uns halten solle wie kriegs

leutte, das wir nicht daher komen mussen wie die

bettler, da haben wir wöllen unseren gnädigen

herren, und dem herr obersten am Rin wöllen

zu schryben, das hatt man uns anfangen drowen

mit hencken, und mitt schedel abhawen, da haben wir

gemeint es gebur sich nicht erlichen kriegs leuten wen

siche ire sachen versehen, wie sich es geburt, und ihnen

zustande, darumb haben wir wöllen einer hohen

oberkeit zuschreiben und dem herr obersten, darum

hatt er uns lassen in den thurm werffen, und wen

uns die kriegs leutte haben wöllen usse helffen, so

haben sie gesaget wir sein dem hertzog uber geben

Gott gebe wie wir geschrien haben auff reht (?) so hatt

man uns ein kein recht wöllen halten, do haben

wir gemeinett, dieweil wir unsseren dienst versehen

haben wie es kriegs leutten zu stehet, wier seyent

nicht unter worffen dem hertzog auff Savoy, sonder

unser gnedige herrn weren unser oberen und rätten

itzund ist unser unterteniges bitten, unser gnedige

herren wöllen uns helffen g(?)uden sachen das wir

recht haben, es thuret mich nicht dir haupt summa

das sie mir nicht werde sondern ich bitte mein gnedig

herren das mir etwas an den kosten werde, weil ich

in dem thurm geworfen bin hatt man mir iden

monat ein krone an der besoldung abbrechnet, es ist

schier ein lange zeitt 10 wochen in dem thurm zu ligen

und zu letzt keine ursach uber in wiessen

(2)

Es ist itzunder 2 jar do hat ein obrigkeitt befollen er

solle mir halben theil des rechts geben, do hab

ich dennest nur litzenze begerett und habe doch

nicht könen dazu komen, so hat mir ein obrigkeit

wider einen brief ihm geschickt do hab ich aber

litzenze begert, und habe doch nicht könen dazu

komen, ich solle postboeten mitt bringen und dem

rest zedel so werde ich noch gezallet werden, seydth

dass ich es nicht habe mögen uber komen so bin ich

rechts sonst gangen in Gottes namen und habe

nicht noch wöllen dienen seidt das ich so in wusten

thurmen gewesen bin.