hochgeachte gestrenge edle nottveste wohlwisse herren herr schultthes

und rat miner loblichen statt luzern, embpietten alle gemeinigklich

die kriegs lutt so under uff die ietzige zitt under des haupttman

alexanders phiffers fendlin erfunden wärden, als unsern herren

und vättren unseren gruoss under tänig geneiggten znd gehorsamen willen

seig nach bestes vermögen E G W heitt jeder zitt zu bevor.

Dem nach ist ess unss von härtzen leid dz wir uss grosser notth verursachtt

und nitt könend für komen sonder E G W als unsre herren und

vättern und unsre hochgeachtte oberkeitt also müossen bekümmern wie es

uns gmeinen kriegs lütthen mitt unsrem haubttman gad und ietz und

ein lange zitt ergangen ist, dz wir sölches nitt mer könnend erliden nach

gedulden also dz wir alle gmeinigklich mid ein andren beratthen, eüch

als unser gnädige herren und vättren uss under tänig und gehorsamer

pflichtt so mir der mer theil under uns eüch zu thun schuldig sind, umb

hilff und ratt an zu rüoffen und gantz undertänig zu pitten. Wir

auch mitt guotter hoffnung E G W werde uns in ienen sachen

uff das beste er manen und wissen, damtt wir gmeinigklich ein

ieder zu dem sinen dar zu er rächtt heig und wz man im versprochen

komen köne. Dz selbig wird sich nitt allein alhie in gschrifften vermelden

sonder auch mitt erlich ampds und kriegs lütten und gmeinen soldatten

erfinden und bewisen. E G W wele es von uns armen soldatten

mitt guttem willen anhören und vernemen, dan wir anders nütt weder

allein dz unssrig begären, und dz der mertheil kriegs lütt in euwer

statt oder grichtt und gebietten da heimen sind auch ein theil uff die

nün jar lang gedienntt und die andren sunst ein lange zitt auch wir

fast al gmeinklich kein ander hauptt gutt wüssen nach hend under

allein ein iedem sin resten wz er alhir an dem haupttman zu fordern

hatt. Wir wellend eüch auch nitt umb ein word die unwarheitt für

gäben, auch wellen E G W die kriegs lütt so bei eüch ussen

sind ver hören wz unser aller mangel und nott ist.

(2)

Es hat sich vor einem jar anfangen zu trägen dz sich die wuchen gältt ge-

hindertt nitt nur zwei oder drei mallen sondern so ettwan die wuchen

gältt zwei oder drü uff zil und tag wie brüchlich komen sind, den

alwägen daruff wider umb gfältt ds hatt nitt alein ein monatt

oder drei sonder ein gantzes jar, sonder dan gantzen winter und

biss in summer. Also dz gmeinigklich alle kriegs lütt us mangel spis

und tranck müossen ire kleider ab dem lib bei den juden oder

anderst wo versetzen damitt ein ieder sin libs narung und uffentthaltt-

ung haben möge und darneben vil kriegs lütt al ire kleider nitt uss

über fluss, sonder uss grossem mangel versetzet und darneben in den

beden ligen biss under wilen nie wuchengältt oder dicker (?) mal nur ein

halbes komen ist, dz sie den ettlichs wider umb glöst und den darbei

aber nütt mer gewüst und gehan. Dz es ettlichen dar zu komen ist

dz sie ettwen zwoen oder drei tag ungäsen und truncken in betten

habend müossen ligen auch ist ess vilen dar zu komen dz sie

ohn hämly oder wamist in bösen schuonen und linen strümpfen

auch gar in bössen kleidern nitt nur ettlich tag oder wuchen sondern den

gantzen wintter in aller keltte müossen ir züg und wachtten versächen

und also jämmerlich umen gan dz ess zu erbarmen ist und auch noch

also ist. Ittem dz der mer theil kriegs lütt sich mitt kräpsen fischen

graben meien und schneiden oder mitt ander arbeit müossen ir brod gwünnen

und erhaltten.

Also dz wir zum dickern mal ver ursachett gsin die amptts lütt also

an zu reden die wil der haupttman niemandt bei uns erfunden wird

wir könend uns nitt mer also gedulden und liden. Die amptts lütt unss

zu gesprochen wir sölend unss liden wie wir könen und mögen es wärd

bals beser wärden.

Also wir uns gelitten haben biss zu in gendem brachmonett da ist der

haupttman zu uns uff die musterig komen so haben wir in gemeinklich

(3)

unssren mangel und nott erklagtt. Er gar vil kriegs lütten geant-

worttett ess müoss nitt mer also zu gan er wel unss allen al unsre ver

setztte sachen lösen und wel uns auch mitt kleider shuoch und andrem versächen

als vil einer mangel bar und nottdürftig seig. Es mües auch dernäben

kein wuchen gältt nitt mer umb ein tag fällen oder manglen. Nitt allein

hatt er unss dz versprochen, sonder auch alss gwüss dz er ein erlicher

haupttman seig und dz ritter krütz an dem härtzen träg wel er

einem jedwedren kriegs man also bar ein halben monettsold erlegen.

Uff dz verheissen und verspräch hin,. ist er an einem morg früe un-

ver sächner wiss in ein garotzen gsässen und uff Türin zu gfaren, und

al unser ver setztte sachen nitt glöst und alss mitt ein andren wir zu vor

lasen verbliben. Uff dz selbig hin vest ein wuchengältt fünff oder

sechse ordenlichen worden und aber du uff den mitten hoüwmonett

die wuchen gältt nid nur umb ein tag oder zwen gfältt sonder umb fünff

oder sechs tag. Und dz ettlich mallen ein andren nach, also dz ess

dar zu komen, dz wir us mangel spis und trankh haben müosen

unsre wachten uber gäben. Aber dz nitt für unss selbertt sonder es hatt

unser lütten amptt zu einem gefreitten und zu sinem rottmeister

und andren mer grett wen biss uff den obend nitt gältt erleid wärde

so söllend sie nur nitt uff die wache ziechen. Dz wir ess von uns

selbertt nitt hätten understanden nach under stan wellen wen wir

nitt ratt dar zu gehan hätten.

Desshalben wir algemeinklich uff mitten augsten zu unsrem lütten

amptt gangen und in umb hilff und ratt angesprochen. Wir könend ietz

nitt also dortt sitzen wen wir schon die wachten nitt mer versächen so

müossen wir denochtt gässen haben. Hatt er unss zu antwortt

gäben er heig unss nütt zu hälffen, heig auch nüt mer umb ein

gabalott zu versetzen ds uns dar durch köne gehulffen wärden

(4)

hatt unss darbei gratten wir söllen uss allen rotten die gefreitten

rottmeister und stadhaltter us schieschen und sölend mitt ein andren

gen Türin zu dem haupttman gan hatt unss auch den wachtt-

meister hoffer mitt unss heissen gan. Dz selbig wir al gmeinklich

gethan und haben 32 uss geschoschen und inen in befälch gäben

wz sie mitt dem haupttman machen und über ein komen seigend sei

wol zu frieden so fer sie wellend nitt mer hunger liden wie sie ge-

litten heigend und hatt auch der lütten amptt zu unss grett man

sölend die köpf zemen haben. Und wen schon unss ettwar bekommen

wurde die eins oder zwei wuchengältt heigen dz uns gehöre sölend

wir dz gältt lassen fortt reisten und söllend wir auch unser strass gan

und unser befälch uss richtten. Und hatt auch grett richten ir vil us so

ist es uns wol gethan. Daruff hin wir mitt ein andren fortt greisett

und da wir gen türin komen, hatt der haupttman anfengklich

nitt zu unss gewellen nach sich sächen lasen. Sonder der herr

ambassitor und der haupttman stocker zu unss komen die

uns mitt ruchen wortten angrett, wz wir hie zu thun heigend

habend unss uff wigler und uffstiffter gheisen. Wir aber inen

kurtlich geanttworttett wir heigen nütt mitt inen zu thun wir

heigen zu dem haupttman Phiffer gedingett wellend und

heigen mitt im zu reden. Uff den andren tag ist der hauptt

man zu unss kommen, und unss an grett wz unser begären seig.

Wir im sölches mitt kurttzen wortten an zeigtt und vor gmältt wz

er unss zu Warcel versprochen und sölches nitt gehaltten weder mitt

wortten noch wärken. So seigen wir ietz under in aller namen

siner kriegs lütten da zu gägen, die wil er inder zitt unss

vil verspräche, und unss sölches nitt gehaltten wärde weder mitt

(5)

wortten noch wärken, und auch dar bei unsser ordenlich wuchen

gältt gar zu witt und zum dickern mal lassen hinderstellig

wärden. Wir unss nitt also mer könend erhaltten und gedultt

tragen. Begärend derhalben ein jeder sin anspruch wz wir an

im zu heüschen heigen. Er uns daruff geanttworttett unser

begären seig zu vil und gross. Wir sölend ein mittel und gliches

träffen, so wel er den zu dem fürsten zu hoff gan, und ein

sölches an zeigen, und unss den ein guotten bescheid wider umb

bringen. Wir uns mitt ein andren kurtzlich beratten und sind

also von unser ansprach komen bis dz der haupttman einem

iedren siner kriegs lütten sölle gäben welchens an im zu fordern

zwen monett sold. Auch söle er unss mitt dem wuchen gältt besser be-

hülflich sin weder es bis datto beschächen seig. Uff dz hin

der haupttman zu hoff gfaren und unss am dritten tag be-

scheid brachtt, dz wir äben als vil gewüst dz zu vor. So haben

wir im zu anttwortt gäben wir könend uff ein sölchen bescheid

hin nid wider zum fendlin komen wir heigend nütt uss grichtt.

Müesend der halben ein rächtte und gewüsse anttwortt haben,

welend al mitt ein andren selber zu dem fürsten im unsern mang-

el und unser nott anzeigen. Der haupttman unss daruff sölches

geratten wir sölend an fürsten ein supplication machen, so wel er

im selbertt mitt unss zum fürsten. Nun wir sölches gethan und dz

schriben gemachtt, so wir halben theil dar mitt ferttig gsin hatt

der haupttman unss bei dem wacht meister hoffer erbotten er wel

nitt mitt uns. Wir sölches fürnemen wie mir wellend, aber wir

mitt dem schriben fortt greissett. Da wir komen, da der fürst

zur zitt gewonett, hatt unss ein tüttscher marqiss an gesprochen

(6)

wir im unsser begären an gezeigett und im wellen unsser schriben uber

anttwortten. Aber er uns nitt wellen abnämen sonder uns geantt-

worttett es seig des fürsten geheiss und willen wir söllend wider

gen Türin zu unsrem haupttman. Der fürst wel den hauptt-

man uns wol zu zallen machen. Uff dz hin wir wider zum

haupttman gangen und im sölches an zeigtt. Uff den nächsten

morgen dar nach hatt der tüttsch margess dem haupttman ein

botten geschickt er söl zu hoff gan er wel in mitt dem fürsten zu

reden machen. Als der haupttman wider von hoff komen hatt

man uns zu anttwortt gäben wir müosend in anderhalb stund

wider uff Warcel zu, zum fendlin und hatt unss auch so dertt gsin

unser wochen gältt gäben. Und hatt unss der hauptmann in bei

sin aller uss geschoschnen mitt ein andren versprochen er wel in

dreien tag nacher komen. Welches er gethan und in 8 tag mitt

unss allen mitt bescheid und gältt behulfflich sin wie eins ieden be-

gären und mangel seige und und mitt im al wol müosen zu friden sin

auff ein sölche guotte anttwortt hin wir al mitt guottem wilen von

im und wider mitt frönden uff Warcel zu greissett, und den übrigen

kriegs lütten sölches an zeigtt. Desselbigen sie auch wol contentt

gsin.

Alss aber die zitt härbei komen die der haupttman

unss versprochen habend wir alzitt gewarttett wen man unss haltten

wel. So hatt uns niemandt kein gutten bescheid wellen gäben

so habend wir 6 tag uber dz zil gewarttett habend wir wider

umb gmeinklich mitt ein andren zum haupttman gewellen so

hatt man unss nienen wellen zu im lassen. Hatt Jörgi Hartt-

(7)

harttman von Bürren den lütten amptt angrett die kriegs

lütt wetten gärn dz der haupttman mitt inen machen was er

den gsanttnen zu turin versprochen. Hatt er schnel zornig klich

geanttworttett man lass nitt nach biss dz man unss ettlichen ein

bein für legen dz man ein wil daran zu gnagen heig.

Ein wil darnach hatt Hanss Käller von Rottenburg zu dem

haupttman gwellen had man in zu dem gmach us gestossen

hatt er von usen den lütten amptt angretth ob man unss gar

nütt wel haltten gott gäb wz man unss verspräche so seigend wir

arme kriegs lütt. Hatt er dem selbigen auch in bei sin vil

redlicher kriegs lütten geanttwortt man lass nitt nach biss dz

man ettlich häncke oder auf die galer thuöe.

Ess hatt auch unsser feld priester herr Gabriel Nussbaum

zum fendrich Göldy gretth die kriegs lütt wellen sich ver

samlen und mitt ein andren zum haupttman uff dz er inen

haltte wz er zu Türin versprochen. Man söltte es dem hauptt-

man lasen wüssen, damitt er den kriegs lütten ein guotten

bescheid liesse wärden wen doch kein gältt vor handen seige

hatt er Göldy dem priester in bei sin andren amptts lütten

es wärd nitt beser bis dz man ettwen zwen hänck oder mitt

inen handle dz ettlichen die kopf empfallen.

Das ist unser haltten gsin uff dess haupttmans versprächen

hin dz er unss zu Türin versprochen, wie vor vermeltt. Also dz

wir nitt könen wüssen wie wir diser wortt söllend verstan

dan ess sind wortt die sich nid gebürend zu erlichen kriegs lütten

zu reden wie wir al mid ein andren sind sonder solche wortt

(8)

und reden die zimen sich zu sölchen gsellen zu reden die

einem bider man dz seinig verträgen und veruntroüwen, und

nitt zu kriegs lütten die allein nütt anders begären

dan allein dz irig und allein nur dz wz man unss mitt guottem

willen versprochen hatt.

Also sind wir under ein andren widerumb rättig worden dz

wir wellend in namen aller kriegs lütten lassen ein brieff

schriben und den selbigen unser hochen und wolwissen oberkeid

gen luzern zu schicken, und die selbig als unser troüw härtz-

ige herren und vättren um hilff und ratt anrüeffen die unss

ieder zitt zu allnen gutten und zum besten wissen und behulff-

lich sein wärden. Damitt wir gehaltten wärden wie

es einem erlichen haupttman und amptts lütten ire kriegs

lütt gepürtt zu haltten. So wellend wir den dar näben

unss auch gehorsamlich tag und nacht früe und spat lasen

finden und uns bruchen lasen wo man unser bon nötten und unser

befälch ist wie ess frommen gott und erliebenden kriegs lütten

gepürtt zu haltten und haltten wellen wir wils gott biss uff

datto geschächen ist.

Ess hatt under uns einer ein brieff für gnomen E G W

zu schriben umb hilff und ratt wie wir die sache söllend an die

hand nämen so bald der haupttmann sölches vernomen hatt er

in gfenklich lassen in ziechen und ein ander hatt wellen von den

kriegs lütten dz gältt uff nämen wz einns jeden guotten willen

gsin wäre damit man dz selbig schriben üch köne zu schicken

hatt man in auch in gfencknuss gleid in die bösten türn die

(9)

zu Warcel erfunden wärden alss wen sie un christlich gehandlett

oder ver rätterei hätten wollen treiben so wären die türn

un christlich gnug dar zu. Dder hauptmann hatt auch inen nitt

könen für haltten weder den einen so er für gnomen zu

schriben den andren nitt anders weder dz er hatt wellen dz

gältt zämen samlen und sie sind schon 36 tag uff behaltten worden

in den schelmen türmen. Und so die kriegs lütt für sie gepätten

hatt der haupttman geanttwortt wir sigend dem hertzog uber

gäben er kön dem hertzog nitt in siner sachen griffen glichfalss

lütten amptt auch sölches geanttworttett. Wir habend vermeintt

wir sigen eüwer under thannen und nitt dess Saffoiers wir

sigend allein nur des hertzogen kriegs lütt ein ieder umb sein

versprochen besoldung so könend wir nitt wussen wz der

haupttman und sin lütten amptt für ein gewaltt haben dz sie

dörffen sägen die gfangnen sigend uber gäben und dz nach

weder urttheil und rächt ist uber sie gehaltten worden auch darzu

dz sie nütt anders begärtt haben dz man uns haltte wz unss

allen mitt ein andren versprochen worden. Und begärends dz

selbig nach und nütt anders ider zitt nitt begärtt allein dz

wur gehaltten wärden wie herr oberist am Rin sine kriegs

lütt halttett die wil wir im under sinem regimentt ge

schworen. Dan der obrist hatt sinen kriegs lütt ider

zitt nach glägen heid heim glasen oder inen sonst gältt gäben

dz sie es könnend heim schicken aber under unss hatt ess nie mögen

also er gan dan der krieg alss ein lange zitt gewärtt hatt

nie allen in gmein kein monett sold empfangen zämen es ist auch

under uns ettlich vor ettlich jaren und vor eine langen zitt ur-

(10)

urlaub versprochen worden und sind nach ider zitt nitt fortt und dar

zu es ettlichen an einem grosen schaden stadtt und glägen ist.

Es ist der halben unser allen in gmein gantz undertänigs

pitten und gottes und maria und des gantzen himlischen heers

willen an E G W wellend unss mitt gott und eren

nach glägen heid hir dänen hälffen und auch dz einer zu siner

bezahllung komen köne. Dan wir wänd uff die wiss nitt

mer dienen gott gäb wz sie unss versprächen so haltten sie uns nitt

sie dörffend auch reden die fürnembsten amptts lütt der

phiffer wer ein schlächtten haupttman wen er sich von den kriegs

lütten liese zwingen. Ach lieber gott wir begärend in nütt zu zwingen

begärn auch nütt noüws allein nur dz unsrig. Wellend der

halben die innigen sin und unss einen von E G W zu

schicken, der mitt dem haupttman und sinen amtts lütten

reden dörffe so ver nimptt man ob der fäler an unss oder

am hauptmann ist. Oder uns ein schriben schicken wie wir unss

verhaltten sölen dan wir händ den wintter uffem halss

und sind al fil wirst kleidt weder den fernrigen wintter.

Weder theil dz den unrächtt erfunden wird so ist es billig dz

den selbig kosten und schaden ab träge, und und ir gnädige

unser herren und vättren wellend die sachen beser erkenen

weder wir es könen mitt dem schriben vermelden oder

sunst von mund anzeigen dan ess wird sich also wir es hie

in geschrifft verzeichend mitt der warheitt also er finden.

(11)

Und ess ist an üch gnädige unsre herren und vättren unser höchstes

pitten wellend uns ein gsantten us E G H W zu schicken so

kan man den dem rächtten grund und die war heid erfinden

wie es an im selber ist und wir händ al gmeinlich nitt gältt

vermögen dz wir langist ein kriegsman könen üch zu schicken

und die gfangen sid schon 36 tag im turm gsin und kommen

nitt ussen wen nitt ein gsantten oder ein schriben uns zu ge-

schickt wird. Und so wir nitt von üch hilff könen bekomen

so müend wir in allen sach un rächt haben. Wen es schon kan

mitt der war heitt erwisen wärden. E G W welle

alles zum besten verstan, und ale zitt gott und maria

fürpitt trülich befolhen. Dattum Warcel den 7 tag ocktober

anno 1619.

In namen und willen aller kriegs lütten

us dem Lucerner piett samptt den zu gwantten

so ietzig zitt under dem fendlin erfunden werden