gestrenger edler vester frommer fürnemer und wol wisser herr
oberster ess ist unser aller kriegs lütten so jetzigen zitt under dess
haupttman Alexander Pyiffers fendlin im dienst sind dz der herr
unb gotts willen so vil bewren (?) und an emmen (?) und unss behulfflich
sei dz ein jeder zu dem sinigen und wz man im versprochen hatt
komen möge. Dan ein guotten theil kriegs lütt so bei unss
sind die dem herren vor langen und kurtzen jaren gedienett
und alzitt ein guott lob von dem herren lasen ussgan.
Wir habend vor 6 wochen für gnomen eüch gnädigen unsren herren
und vättren zu gschriben und aber dz selbig nitt könen forttbringen
sie habend den Wolfgang Mattler von Rott so eüch für ein
trapantten gedientt der für gnommen eüch unsren herren zu schriben
und Jörg Harttman von Püren mitt ein andren gnomen und in
die bösten gefencknuss so in War cel erfunden wärden lasen
legen und sind ietzund (?) schon 36 tag drin gsin und mögend
nach nitt wüsen wen man sie werd ussen lasen so wir kriegs
lütt für sie pitten so gend sie zur anttwortt sie seigend dem
hertzigen über gäben. Oder der Phyffer wer ein schlächtten
haupttman wen in die knächtt möchtten zwingen wie den der
herr allen brichtt in dem schriben so wir gmeinklich eüch
unsren herren und vättren zu gschriben wol wird verstan können
dan wir begärend nütt andres dz wir gehaltten wärden
was man uns alle tag versprichtt. Sie dörffen einen hütt ein
sach versprächen so dan einer begärtt man söl im haltten so sägen sey im
von häncken oder komend sonst mitt ungebürlich wortten. Ist
allein unser begären nütt anres und ir gnädige herren
wellen unss ein gsantten uss eüwerm ratt zu schicken so kan
man wüsen und verstan weder theil unrächt oder rächt heig wir
händ eüch nitt ein wortt gschriben so ess von nötten ist mitt der warheitt
könen er wisen E (?) Und so ir unss nitt einen zu schicken so ist
(2)
kein rechtte ordnung mer auch komend die zwen gfangnen
nach ein lange zitt nitt uss der gfencknuss und sind in aller
namen und unb unschultt drinnen. Dan die selbig zwen
und wir al mitt ein andren händ kein sach nitt an gfangen
ess ist des lütten amptts geheiss gsin und sein eigen ratt. Ietz
ist er wider unss. Der haupttman und sein lütten amptt
sy gönd mitt sachen und mitt der unwarheitt umb dz einer
kum dem andren kum darff darvon reden. Und es ist uns
allen höchste pitt an eüch gestränger herr obersten wellend
dar zu ratten und hälffen dz uns einer uss eüwerm ratt
zu geschicktt wärd oder ein schriben von eüch wie wir uns ver
haltten sölend. Dan wir könend uff die wiss nitt mer
dienen wänd auch nitt mer hunger liden wie wir gar ein
lange zitt gelitten händ U (?). Und der herr seig von uns allen
zu tusend mallen grüosst. Und Gott und Maria für pitt
trülich befolchen. Dattum in namen aller kriegs lütten
so under des Phiffers fendlin im dienst sind und der
mehr theil uss der statt und lanttschaft Lucerner gebiett
den 7 tag oktover im 1619 jar zu war cell
Und ich Wolffgang Mattler pitte den herren dz unss in
kurtzer zitt gehulffen wärd dan wir händ die sach nitt an
gfangen ess ist des lütten amptts ratt gsin wie wir den ess alles
mitt guotten erlich amptts und kriegs lütten er wisen. Und
weiss auch nitt wen wir uss der gfencknuss komen dan ess ist
die gantz red ess kome ein gsantten von eüch gnädig herren zu
unss inen daruff wartten sie und lasen uns nitt usen den sie
fürchtten wir gängend gen Lucern. Ich wil den herren den
ein ander mal erlich und redlich dienen.
(3)
Dem gesträngen edlen vesten fromen
fürnemen und wolwissen herren herr
oberster Heinrich Klos. Ritter des
ratts und vendrich der loblichen
statt Lucern. Unsern hoch
geachtten herren und vättren
zu uber anttwortten
und er öffnen in
Lucern