Zwüschent J. Hans Cloosen 1.

So dann hauptman Gilg Fleckenstein 2.

Ist erkent

Nachdem MGH abermahlen mit beduren fürkomen,

die unruow, so etliche solldaten, im letsten meylandischen krieg,

under h houptmann Gilgen Fleckenstein, unnd h hauptman

Jost Bircher [gedienet], von wegen vermeinten usstands und mangels

ihrer besoldung, erweckt und trybent, unnd desswegen

der sach flyssig nachgetrachtet, damit sy ze allen theillen

geruwiget, gestillet, unnd vernerer widerwillen ver-

mitten werden möge. Unnd damit nun glych sy die

solldaten der sach ein grund haben mögent, so sölle mit ihnen

noch vor dem angesetzten rechtstag uff ein nüwes ordenlich

(2)

abgerechnet werden, was ein ieder verdient, unnd was ihme

davon zallt worden sye, unnd zuo diser rechnung sind verord-

net, herr hauptmann Ullrich Heinerli, h hauptmann

Mauritz an der Allmend, h spytalmeister Adam

Utenberg, unnd h hauptmann Hanns Zimmermann. Mit

disem zuothuon und erlüterung, diewyl MGH

nit unbillich findent, das nach dem gemeinen rechten

by allen nationen, in kriesgfählen, ihnen den solldaten

ein monat solld für die rantzion abzogen werde,

wie glych sy die solldaten selbst zuo Ast begert, unnd

bätten, und an die h hauptlüt begärt, das sy sy lösen,

unnd da dannen helffen söllent. Deswegen soll

disen solldaten kund unnd zuowüssen gethan werden,

das wellcher under ihnen umb 12 monat 10 tag

bezallt worden, der sölle ruöwig syn und nit erschynen

den demselben einmahl wyters nitt wirdt zuobekent,

oder zuogesprochen werden. Wo aber einer oder meer

minder empfangen, der soll sich by obermelten heren

ankünden, dann wirdt guoter bscheid unnd antwort

vollgen. Im fahl dan im künfftigen obgedachten h

hauptlüten an ihren erlittnen schaden verehrt

oder erstattet wurde, soll ihnen den solldaten darvon nach

gebür ihr rata auch vollgen unnd ersetzt werden.