Hochgeachter Herr

Ich acht ihr wärdent von her Heinrichen berichtet syn

wie das heren haubtmanns sachen beschaffen und was

massen ehr gehallten worden iedoch so hat zuominer

entschuldigung, mich für guot angesächen üch minen bericht

auch zethuond, und namlich so wüssent dz sidt üweren

hereisen (?) mir an asignationen empfangen, ducat.

12462 zuo 13 florin uf der durchlüchtigsten h

princessin unser gnedigsten frowen Donatia ihro

von stato (?) beschechen, ducat. 7880 uf Vercell

unnd Vercellens in 7 quartieren zuzalen daran bis

dato inbracht worden - 1100 fl die all h lütte-

nannt Michel Pfyfer empfangen. Wytter ducat.

3392 uf die iulin zuo Bieli und die Bieler daruf ein

quartier erlegt worden thuot 2467 fl. Item

uf den kah (?) ducatonen 1190 an zweyen quittanzen,

danach her Johann Cösler die ein umb 547 duca.

gegen bezalung dessen, so ehr anzeiget zum theil uch gewärt

haben und zum theil herren haubtmann und den soldaten

nach zuwähren und zubezalen habe, zuo gestellt worden.

Die ander umb 720 kron hat h Heinrich empfangen

die ehr uf rächnung dese so ehr fürgibt man ihm schuldig,

behallten. Das übrig von diser asignation

(2)

ist us bevelch ihr ersten (?) dhl des haubtmanns gloub-

igern und ansprechern geordnet und zuogeeignet worden.

An asignationen und baarem gellt ist mir wytter nit

worden dan 9942 fl daruf ich uf rächnung

zallt, lut quittanzen 13084 fl also dz man mir über min

salarium schuldig blybt 3142 fl 6.

Hat sich verschinen tagen begeben, alls ich einen botten nach

Vercell umb gellt uf die asignation dahin wysende, ab-

gevertiget, das syn haubtmann Pfyfers ambt

und kriegslüt zuohergfaren, und so der h guber-

nator daselbs sich nit daryn gelegt sy nit allein ihme

alle schriften und quittungen genommen, sonder auch,

wo veer ehr sich nit mit guoten worten usreden khomen,

ihme über gehandlet hattent. Und mir wol ich vor-

habens war, nach Vercell zuverrisen, und rächnung uf

zuonemen, wegen des von der statt ihme h lütenannt

erlegten gellts, auch mit ihme umb dz erst quartier

abzurächnen, und zesächen was den ambt und kriegs-

lüten uf dem houbtmann usstan möchte, in meinung hegigen (?)

ihnen darumb so vil asignationen zu zestellen, alls aber

ich vernommen, was sich mit besagtem anwallten ver-

lofen, hab ich min fürnemmen iegestallt sidtenmal

die ambt- und kriegslüt zuosamen geschworen haben söllent

(3)

mir das gellt unnd schriften innemmen unnd da

ich mich wöhren wurde, mich ubel zetractieren, das

ich ihr h avisiern würdt und bitt darumb ihr

wöllent zu vermydung söllcher ungelegenheiten ein

anderen der sich des haubtmanns sachen belade und

anneme verordnen. Dann mir (?) ist gnugsam,

zerästen des verlauf, und des guten willen, unnd dz

ich umb miner liebhatten (?) willen versteiniget werden

dz mal nützit annders dann das ich hieruber erwartende

bin üwer antwort. Mitt bitt h Oberst Am Rhyn

ein gruoss und dienst neben wünschung aler wolfart

anzumällden. Us Thurin den 28

augusti 1620

ds h

gantz geneigter diener

Johann Francis Melazana

Bitt mir üwer antwort in italienisch zukhomen

zlassen damit ich selbige für mich selbs, ohne

eines dollmätschers läsen khönne

An h lütnannt Niclaus Meyer