Donst post oculi (?)

Da hatt [Einschub: Hanns Hebdenring der fry amptman gesagt wie daz der erbare meister Michael]

[am Rand: Wensler den erbaren / Jacob Allgouweren von / diss nachvermerckte

stuck in by wesen sin / unnd Martin von / Tachsfelden dem / underkouffer der statt

Basel [Einschub: das nachvermerckt stuck] / zekouffen geben hette

also sich auch derselb / Michel in gegen wertikeit / der obgeschribnen personen

unnd inn der notarie / hannden geschriben / bekannt]

[gestrichene Zeilen]

das er fur sich unnd sin erben, eins uffrechten

redlichen unnd in allen rechten unnd gerichten bestentlichen kouffs ze

kouffende geben hette, dem erbarn Jacob Steinacher genant Algower

auch burger zu Basel, der in namen sin selbs und aller siner erben

von im also koufft hette allen unnd yegklichen werckzug, und [Einschub: truck]

geschirr es syent bressen ramen formen und [Einschub: sust mit] aller

zugehörd alle sin ussberatt (?) geschrifften klein und gross matrices

und alle andern bereittschaft und werckzüg so der druckerye

(2)

gehortt gehören mochte unnd er yetzo innhends hab der inne er im

genatlichen nutzit vorhalten soll nutzit ussgenommen noch vorbehalten es sye

[Rand: genempt oder ungenempt] in kein wise, alles für sin fry ledig eigen und unbekundertt

gutt [Rand: als derselb meister Michel by gutten truwen behüb] unnd ist solcher kouff geben unnd beschen umb iic und lii

gulden (253 Gulden) rinischer gutter unnd genger, deren meister Michel Wensler

der verkouffer von Jacob Steinacher dem kouffer obgemelt also bar

bezalt sin bekannt unnd demselben kouffer unnd sin erben für sich

unnd all sin erben fry quitt ledig und los sagt mit derro geschrifft.

Uff das so hatt derselb meister Michel, dem obgenanten Jacob Steinacher

den obgenanten werckzüg [Einschub: schrifften] unnd truckgeschirr samt unnd sunders

mit aller zügehord von sinen zu Jacob Steinachers hanndt

unnd gwalt samen geben, unnd uberannttwurtt, damit hinfür

mogen hanndlen walten tun und lassen als mit siner eigentlichen

erkoufften gutt satzt im auch des in einweg (?) besitzung unnd gwer

unnd verzech sich aller recht unnd gerechtigkeit so er daran

haben solt kennde oder möcht in einich wege mit versprechnus by

sinen guten truwen an geschwornen eydes statt dem obgemelten

Hannsen Hebdenring als einem geschwornen amptman getan,

disen kouff und verkouff stett vest unnd unverbrechentlich zehalten

da wider nyemer zekommn zereden noch zetund ouch das weder

schaffen noch verhengen in kein wise sunder dem obgenanten kouffer

unnd allen sin erben des obgemelten kouffs für frye ledig eigen

zewerende unnd inen darumb ein gutt sicher redlich werschafft

zetund an allen ortten inn oder uswendig gerichtz da sy deran notturfttgit

werden als recht ist. Mit recht verziehung aller unnd yegklicher

fryheitt fryrechten sitten gnaden unnd gewonheitten der herren steth

unnd des lannds aller yegklichen landrechten stettrechten unnd

burgrechten und sust aller usszugen listen, unnd geverden, damit

er, sin erben oder yemands von iren wegen sich wider dhein

hier angeschriben ding behelffen konnd oder mechte geverd unnd

argenlist gentzlich hierinn vermitten unnd ussgescheiden alles

in der besten form wise unnd mass als ob das mit urttel unnd

recht zugangen gevertiget gevestnet und fur krefftig

erkannt were.