Jacob Seckler bezügt by dem eydt so er minen

g h gschworen, sich hab zuotragen, kurtzer

tagen, dz Poley Häfeli vol wyns gsin unnd bim

tor umbhar gangen, unnd alls Niclaus Felix in mit

dem pentzion gellt speytte, wurde er zornnig fluochete

den kronenfresseren in betten oben villmalen bey

unsers herren fünff wunden, und sonst, unnd alls

er gezüg in ghortte, bim tor, rette er was ists

antwortte Häfeli, he es ist das dich botz [...]

schwüre übell, rette er gezüg nit allso Polei

ich will dir uffthuon, genge abhin thete im uff

rette was ist dir, he rette er das gotts fünff

wunden die kronenfresser in betten oben schend,

ich will ouch dess gellts han, unser sind noch

me, Davidt Schwartzhanns hatt sovill mit

minen herren geret das im iii kronen worden

unser sind mer, die werden

noch me darvon reden, rette er gezüg nit

allso Polei, du bist ein armer frömbder gsell

schwyg und bis rüwig, unnd minen herren

ghorsam, mach dich nit fyentselig, gegen minen

herren, tobette vast meinte er möchte in nit

zum tor usbringen, ie zuletst gienge er ushin

rette man het mich mal könen finden gan

Costantz ushin ufznen, gegen keyser

bin ich nit sowol ein burger alls ein andrer

dorumb will ich ouch han. Actum zinstag

Cirilli 1549