Ich Jacob Bratteler schulthess etc. tun kunt daz fur mich in

gericht komen sind Bernhart Falckner von Rinach eins

unnd Hanns von Memingen der Gerwer burger zu

Basel anders teils, da so liess der genant Bernhart

in clags wise offnen, wie denn hie vor erkannt

sye daz Hanns Meminger sweren oigen

unnd zoigen solle, alle siner eefrowen seligen nach

tod verlasen gütter solich oignung unnd zoigung er

getan unnd dar inn vier stuck verhalten [gestrichene Passage], nemlich

viii ß gelts uff einem huss in der Gerwergassen gelegen

item x ß item aber i lb sodenn vii lb schulden, wie denn

die selben stuck durch in anzeigt sind,

in hoffnung daz die selben vier stuck Bernhartten

ein verfallen gütt sin mit sampt erlittenem costen [gestrichene Passage]

unnd daz Meminger in solichem uberfaren hab

daz setz er der oberkeit heim dar inn mogen handlen dawider

Hanns Meminger reden liess solich anfechtung beschee unbillich

denn er annders nit denn ein fromwer gehandelt geoigt unnd

zoigt hab unnd solle sich auch annders nit erfinden unnd als

die wider pthye anziech viii ß gelts darzu sag er das er nit

schuldig sye gewesen die selben gult ze oigen angesechen

daz die in sin sessus dienen und vallend syent innhalt

eins brieffs den er desshalb hören liess, die andern dru stuck

die wider pthye selbs wol gewisst hab, alsdenn das ander

verhörtten kuntsch lutter und clerlich verstannden sye,

solich sachen mit vil me wortten, zu der urtel

setzende, dwile nü in handlung der sach unnd an

(2)

der kuntschafft, verstannden ist das Meminger oigung

und zoigung bis an vier stuck getan unnd er

uff ubergebung derselben oigung, gewarnet worden

daz er fur sich selbs schn (?) unnd bas erinnern solle

daruff Meminger geredt als die kuntsch gesagt hatt

er bedörff witter er innerens nit sonnder hab er

by dem eyd den er dann gesworen hab volliklich

geoigt unnd wiss witter nit sonnder ob sich utzit

hienach erfunde das solte Bernhartten ein verfallen

gutt sin, by solichen Memingers wortten zemercken

daz er in vergessen gewesen, unnd die vier stuck nit dozemol

gewist hatt, unnd ouch der verhörtt brieff lutter

anzeigt, daz die viii ß in sin Memingers huss

gehoren, solichen allem nach so ist mit der merern

urtel erkannt, daz Meminger nit schuldig gewesen die

viii gelts ze oigen noch zezoigen sonnder deshalb

ledig unnd entprosten sin, aber der anndern dru stuck

halb dwile dann Meminger als vorstatt geredt hatt

bo sich utzit hienach erfund daz dasselb Bernharten ein

verfallen gutt solte sin, daz dasselb daby bligen die selben

dru stuck die x ß, das pfund unnd die vii lib

demselben Bernhartten im furer zügehoren unnd

Meminger nutzit an dem selben haben doch daz derselb

Meminger desshalb siner eren nit geletzt sin solle, zu urk.