Ich Jacob Bratteler schulthes etc. Embut dem ersamen

Niclaus Kessler dem büchtrucker burger unnd des rats

zu Basel, min grus unnd lass uch wissenn daz uff hut datum

für mich in gericht kommen sind, Michel unnd Frantz

Galician Burger zu Basel. Offneten wie ir dann inen

hundert unnd achtzechen gulden, lutt unnd innhalt eins

schuldbrieffs, uwer (?) eigen hanndgeschrifft, schuldig unnd ze

tünd weren, inen ouch solhe sum obgemelter schuld, in

das gerichtzbüch der statt Basel, veriechenn sy nach der

statt Basel recht, uss zerichtenn, die selbig zit aber vor gütter wyl

verschinen, sy noch unbezalt, desshalb ir beger were

an einer urttel ze erfaren wie sy sich halten damit sy

der bezalug, gegen uch bekomen mogen, oder aber inenn

in uwer huoss zugannd, gnügsam pfennder fur selliche schuld

wie recht were, usszetragenn, zevergonnen. Uff sollichs

(2)

ward erkannt, daz die genannten Michel unnd Franntz

Galician, deshalb uwer zuokunfft in der statt Basel, er

warttenn wa sy aber das nit tün, das sy dann uch

derzuo verkundenn soltenn. Harumb so verkund ich,

uch das uff ir witter anruffenn, von gerichts wegen,

ob ir utzit darzu zeredenn habenn vermeinten, daz ir das

hie vor nur in gericht tun wellen in vierzechen tagen

den nechsten, nach dem uch diser brieff uberantt-

wurt, dann so das nit geschee, wirt nutzit desterminder

uff ir witter anruffen bescheen was recht sin wirt

darnach habenn uch zerichtenn.