Zwischen Jerg Hertzog als volmechtiger anwald miner gn frowen

von Segkingen eins und frow Dorothe Murerin annders teils

alsdann der annwald offnett wie dann hievor erkanntt

were daz min gn frow irer verschribung nach irem inhalt

gegen Iunckher Verltin Murer, nachkomen mog so were

sin beger daz die gemelt frow Dorothe, sweren solte, ze

eigen unnd zeigenn, Iunckher Veltin Murers, irs suns guts

sovil sy des wisste, darwider frow Dorothe dartette, sy

hette mit irem sun Iunckher Veltin, noch nit geteilt,

deshalb sy nit sweren konnt, ze eigen und zeigenn,

aber ir beger wer iro zvergonen, sych in vierzechen tagen

nach der statt recht, zevogten, so welle sy alsdann

mit irem sun Iunckehr Veltin teyllen unnd dannathin

dem widerteil, geburlich annttwurt geben. Ist

nach clag anttwurtt und allem furwennden erkanntt,

möge da die gemelt frow Dorothea ein eid sweren sover

sy des von dem widerth nit erlassenn werd, daz sy

mit Iunckher Veltin irem sum noch nit geteilt hab,

das sy dann den uffslag, die xiiii tag habenn,

sich darinnn vervogten unnd dannathin mit Iunckher

Veltin teyllenn, unnd was Iunckher Veltin zu geteilt

wirt, hinder iro biss zu usstrag der sachen behalten,

unnd dann furer gescheen solle was recht sye.