Wir der schulths und rat der statt Lucernn, tuondt
kundt aller mencklichen mit disem brieff das uff den
tag synes dattums, uff unser befelch, nach unser statt bruch
recht unnd gwonheitt unser ratsrichtter, uff begären
der fromen ersamen Gallg Rechenberg unsers grossen rats unnd
Hanns Willtperg unsers burgers, volgende kundtschafft von
dem fromen ersamen Jost von Mettenwyl unsers grossen rats
uff unnd ingnomen. Hatt also bezügt alls houptman
Frölich oberster imnamen dess cristlichen küngs mit den eydt-
gnossen gan Comerach in Savoy komen, den kriegslütten
die ordinants vorläsen lassen. Den er gezüg zuovor
umb ein ampt gebetten, alls aber domalen ime gezügen
kein ampt gelangen möcht unnd man im ein fendlin zuo-
stellen wöllt er nit ein fendrich platz annemen sonders uff
ein ampt so im mittlerzyt eins werden möcht wartten.
Allso nach verhörung der ordinandts retter der obrist
houptman Frölich so gmeinen kriegslütten im ring, ir hend
nun die ordinants ghördt, wir sind nit angnomen worden
werden ouch nit dienen nach der vereinung, sonders wider
mencklich on wider ein eydtgnoschafft das syg mitt stürmen
oder sonst, unnd wölicher nit allso dienen will, dem will
ich ein passport gen, der mag wider heim zien, und die
so allso blybent und dienent die söllent ghallten und
bsallt werden wie die eydtgnossen ghallten und bsallt
worden sind, so heivor in Piedtmondt gedienet hand,
und houotman Fuchsberger hab volgents uff ein zytt zuo
Hanns Willtperg sym schryber geredt, schryber zu hest
ein guott ampt, und darneben von mir ein guotte besold-
und du magst mer fürschlan dan ich mit miner houpt-
manschafft ich würd dir an der bsoldung abbrechen.
Antwortte Hanns Willtpert dem houptman, herr
houptman man bsallt uns uff die emptter ietz nit
volkomlich, wan man unns volkomlich bsalltte wie von alltter
(2)
har wie mans versprochen, und verheissen hat und schuldig ist
antwortte houptman Fuchsberger dz
schatt dir nütt das ist nun dyn sparhafen, würts dir ietz
nitt so würts dir deheimen. Er gezüg hab ouch
vilmalen von houptlütten ghördt das sy für und für
geret, der herre Murlet hab verheissen, wir söllent
unnd werden ghallten werden wie die eydtgnossen hievor
in Piedtmondt ghallten worden sind, allso werden wir die
ietz dienent ouch ghallten werden. etc. Sodann
genant die unsern diser kuntschafft sage geschrifftlichs
schyns begert hannd, unnd mencklichen urkundt der war-
heyt nit versagt werden solle, so hannd wir inen disen
brieff mit unser statt secret insigell verwardt
gaben lassen uff zinstag vor corporis cristi von
syner menschwerdung gezallt fünffzechen hundert
fünffzig unnd darnach im fünfften iare.
(3 Neues Dokument)
Uff andingen Gallg Rechenber und Hanns Willrpergs hatt bezügt Jost von Mettenwyl
und gebott Hanns Wellgins zinstag vor corporis cristi 1555
Bezügt Jost von Mettenwyl alls sy gen Chamberin komen und den
obersten Frölich bätten ume sbest zthuon, alls aber im kein ampt
zuogstellt wurden wellt man ims fendlin gen rette er wellst nitt
sonders uff ein ampt warten, und alls sy die ordinants verläsen
lassen, hab Frölich geret ir hand nun die ordinants ghördt wir
sind nit angnon worden ouch nit dienen nach der vereinung sonders
wider mencklich on wider unser heren die eydtgnon [am Rand: das syg mit stürmen oder sonst] und welicher
nit allso dienen will, dem will ich ein passport gen mag wider
heim ziechen, und die so allso blyben und dienent die
werden ghallten und bsallt werden wie die eydtgnossen vor
in Piedtmont ghallten sind. So hab Fuchsperger zuo
sym schryber Willtperger grett, schryber an diner bsoldung
will ich dir abrechen, du schlast mit dim ampts soll meer
für dan ich, antwortte der schryber man bsallt uns nur
halb, rette Fuchsperger das schatt dir nüt es ist nun
die sparhasen, würds dir nit ietz so würts dir daheimen
er hab ouch dyk von houptlütten ghördt sy für und für geret
der herr Murlett hett uns verheissen wir söllent und werden ghallten
wie die eytgnossen hievor in Piedmont ghallten worden allso
würt er uns ouch hallten.