Testis productus pro wirt zum Regenbogen

contra Ursula Sylberhensslins wyb

Anna von Waltpurg hat gesworenn unnd gesagt daz sich

in verganngen tagen begeben habe daz der wirt zum

Regennbogen, zu Ursula Hannsen Sylberhensslins wyb,

uff dem Kornnmerckt komen sye unnd zu iro gesprochen hette

die oder derglich wirt Wann ist es zit das du mich bezalest

daruff sy geannttwurt hette sy hette mit siner husfrowen

geredt darby es belibe, daruff der wirt geredt hett, er

kertte sich an selliche wort nit sy hette im, das sin abgossen,

unnd truncken unnd welte bezalt sin uff sollichs Ursel ge-

annttwurtt hette, ob sy im ettwas schuldig so were gutt

recht hie unnd solt sy mit recht furnemen, daruff der

wirt redte, daz der Gott den ritten geb als balgs mich

geluste, daz ich dich in das antlit slug, so du mir das min

abgessenn unnd truncken hast so butt mir dann recht uff

sellichs Ursel annttwurtte, balg much mutz dann ich

hab ein eeman unnd gelust dich so slach mich, bin ich

dir ettwas schuldig so ist gutt recht hie unnd wern also

von ein annder kommen.