Testis productus pro Hanns Zerbach et Hanns

Zschannwir wirt zu Richsen contra Peter von Tann

Meister Thomas Schärb hat gesworenn unnd gesagt daz sich in

dem nechstverganngen iar vor herbst begeben hab, sye Petter

von Tann zu im disen zugen komen unnd in gebotten, mit

im gen Richsen zeriten, da habe er win ligen die im durch

sin schuldner in verbot gelegt syen unnd im die helffenn

zeledigenn so welle er im die win legen. Uff sellichs diser

zug mit Petter von Tann gen Richsen geritten da were

yederman, wem Petter von Tann schuldig gewesen were, kommen,

unnd hetten also dieselben vernügt. Nach dem selben hette

Hanns Zschanwir der wirt ouch sin schuld an Pettern ge-

fordert, unnd mit ein annder gerechnott, unnd daruff

er diser zug einer yterschenn guldin für i lb ii ß undd darzu

ettlich muntz, dem wirt fur Petter von Tann geben,

daruff sich der wirt des gl zenemen gespertt da hette er

diser zug zu dem wirt gesagt wo er den gl nit zu volem

werde, wie er den neme so selte er im den widerbringen

so welte er im sovil muntz dafur geben, als im ouch der

wirt sithar den gulden wider pracht unnd im muntz dafur

geben. Aber wievil oder was Petter von Tann by der

rechnung dem wirt schuldig verliben oder in mit solhem

gelt gar bezalt wisse er nit.

Martin von Tann hat gesagt das in verganngen zit Hanns

Zschanwir wirt zu Richsen mer dann ein mal zu Richsen

unnd Basel zu im komen und im gesagt wie im Petter

von Tann sin dis zugen vatter, [Einschub: iii ß i lb] schuldig sye unnd

in daruff gebeten mit Petter sinem vatter zereden damit

der wirt bezalt wurde daruff er diser zug dem wirt zuge-

sagt hette selliche meinung mit sinem vatter zereden ob

aber sin dis zugen vatter, dem wirt vil oder wenig schuldig

sye wisse er nit hab sich ouch gegen dem wirt nye begeben

einichen pfennig fur sin vatter zubezalen.