Testis productus Diepold Rodinger datum (?) annamen

Claus Lutfrid contra Hanns Lutfrid de Basel

Anna Fugerin hat gesworen unnd gesagt, daz sich uff einen

tag, nach unnsers lieben herren fronlichnams tag nechst

vermerkt begebenn hab sye Hanns Lutfrid zu ir diser zugin

unnd Ennelin irer tochter in ir husslichen wonung zu Basel

by sannt Urslenn gelegenn unnd als er in die stuben

ganngen were, hete er Ennelin ir tochter heysen gottwil

kom sin unnd daruff geredt ob sy im gelt von irem man

Clausen Lutfrid brecht, sagte ir tochter Ennelin nein,

sy brechte im kein gelt, sagte Hanns Lutfrid, warumb

hette ir tochter geannttwurtt, ir eeman hette selber

keins daruff Hanns Lutfrid zu ir tochter redte

wo ir man were. Sagte sy er wer nit dhein unnd were

im Welschlannd da welte er einem herren dienenn,

daruff Hanns Lutfrid widerumg zu ir redte, waz sy

dann hie tun welte wer ir zeessen gebenn wellte unnd

welte ir raten sy verpflichte sich zu einem biderman

unnd diennte demselben wer ir weger dann das sy

also hie sosse unnd hetten also sunst vil mit einenander

getriben (?) die nitt nott syen zemelden.