Meister Michel Yselin genant Zschan hatt gesworen unnd

gesagt daz war wie durch Heinrich Buttermag an in gezogen

als die kö m zu Colmar gewesen, da were er diser

zug sin k gnaden nach geritten ettlichs geltz halb so im sin

k m schuldig gewesen unnd noch zum teil were und

daselbs zu Colmar in Heinrich Buttermorgens hus

unnd herberg genant zum Blümen gelegen unnd als

die obgemelten meister Marx von Ladow und meister Christoff

Riser von Insbrugk ouch in derselben herberg gezertt

hetten in willen kemen hinweg zeritten da wolt sy

der wirtt obge nit abrytten lassen sy tätten dann in bezalen

nemlich xv gld rinischer vi crutzer so sy an im verzert, also

hetten die selben zwen nit gelt und hetten

der edel strenng hr Hanns von Hallwil ritter und Junckher

Burckart von Halwil sin vetter ouch er diser zug guttlich

zü den sachen geredt, daz sy der wirtt hett lassn ritten

doch also daz sy bede, hr Hansen von Halwil an sin hand unverscheidenlich

für sich unnd ir erben by den eyden der k m getan glopt

unnd versprochen hetten dem wirtt die xv gld in gold vi crutzer in

xiiii tagen den nechsten on allen sin costen und schaden ze

schicken unnd ze annttwurtten gen Colmar in sin huss

oder wo sy das nit tätten sich beide by derselben glopt unnd

eyden wider mit iren pferden unnd hab von stund nach verschinen

der xiii tagen gen Colmar wider in sin herberg zestellen

unnd dannen nit zekomne Buttermorgen were dann vernungt

dis sye beschen uff mittwoch vor dem bartag (?) in dem

lxxxxiii iar vergangen das sye im eigentlich zewissen.

[Rand: und weren ouch beide burg unnd gulten für ein ander worden für sich

und ir erben unverscheidenlich]