Testus productus pro Cunrat Harder

Conntra Michel Tuschen knecht

Hanns Kiburger sagt daz sich in verganngen tagen begeben

hab sye er unnd annder messersmidknecht in irem garten

gesessen, unnd weren unnder selligem Cunrat Harder

unnd Jerg einer genannt Jerg des obersten knechts knceht

auch zu inen komen unnd hette Cunrat anfachen zu

Jergen zereden, er hette ettwas mit im zereden dann,

er in gegen sinen meister verclapert hette des er im nit nach

lassen konnde, wider sollichs Jerg nit vil redte sonnder

sagte hette er im ettwas an inzesprechen so were

gutt recht hie, unnder sollichen noch vil worten hette

Cunrat Harder sin fust erzuckt unnd Jergen in sin

angesicht geslagen, unnd darnach bede teil von leder

gezuckt unnd zesamen gehowen, unnder sellichem Jerg

Henslin Heuser Michel Tuchen knecht ouch von leder gezuckt

unnd Cunrat Harder gehowen hette, unnd were

des kriegs der sach unverwandt.