Hanns Switzer von Plotzen hatt gesworen unnd gesagt

daz sich in vergangen tagen begeben daz er diser zug

zu Casp Runhker komen, da were Riser ouch zu inen

kommen da hett Casp zu Risern gesprochen, wie er vernommen

daz er Paulin Matter gefangen hett, daruff Riser gesprochen

er hett in nit gefangen er hett im doch den vatter gezoigt

unnd Paulus Vatter, were im nün pfung schuldig

gewesen die hett er im bezalt biss an iii lb, witter sye

im angezogen meinung halb nit zewissen da

Paulus Matters Vatter usserlannd gescheiden

sye daz do zü zytten derselb Paulus ein kind unnder

sinen iaren gewesn in massen er kein versprechnus

noch burgschafft hab mogen tün.

(2)

Hug Korb von Plotzen hatt gesworen unnd gesagt,

daz sich in verganngen iaren begeben als denn

Hanns Tempelmann zu Plotzen gesessen daz hr Fridrich

Ze Rin Ritter, demselben Hanns Tempelman einen zehenden

verliehen hett, da were Clein Pipper, burg fur

Tempelman worden, unnd als Tempelman hinweg

kem da were Clewin Pipper angenommen unnd in

krafft siner burgschafft, hett musen bezalen unnd

hr Fridrichen usrichten unnd als Paulin Matter

Hanns Tempelmans sun dem vatter den zehenden

hett helffen heim furen unnd velicht musen

unnd nyessen, da hett Clowin Pipper Paulin als den

sun, in krafft desselben furgenommen, unnd mit recht an

clagt in meynung in ze entheben, da hett er diser

zug Paulin zü Plotzen am rechten sin red getan

unnd gemeint, solichs nit billich sin angesechen daz

Paulin unnder sinen iaren gewesen were ouch unge-

erbt ussgan unnd mit sins vattern gutt nutzit zeschaffen

haben wolt, ledit von Clewin Pipper, unnd im mit

recht ussgangen, daz er aber wiss ob Paulin Matter

dem Pipper utzit fur sin vatter zu gesagt hett das

wiss er nit aber wol ze war daz Paulin zu

zytt obgemelter rechen tagung so iunng gewesen

daz er im nit mecht unnder richtung der sach geben

wol hett in Heiny Hurst by dem Pauli de zü zytten

dient hett unnderrichtung der sach getan.

(3)

Hanns Mathis von Plotzen hatt gesworen unnd gesagt,

daz im noch wol ingedenck sye daz Clewin Bipper

den gemelten Paulin Matter, zü Plotzen mit recht

furgenommen hett einer burgsch[aft] halb so derselb Paulin

für sin vatter in ganngen sin solt, da were Paulin

derselben ansprach halb uss ursach

daz er ungeerbt ussgangen were von Clewin

Bipper ledig erkannt worden ob aber Paulin ze iunng

oder ze alt zu zytt getaner burgsch gewesen sye

im nit wissen.

Lienh Meder von Plotzen hatt ouch gesworen

unnd gehilt obegeschribner sag.