Testes producti pro Lorentz Tremer sutor

contra Michel Merget von Swinfurt

Conratt Smidlin Hanns Hiltprannd der tuchmans

knecht hatt gesworen unnd daz in dem lxxxvii iar umb

unnser frowen tag ir geburt nechst vergangen

einer genant Michel Mergett von Sinwfurtt,

mit Lorentz Tremer dem schuchmacher zü Basel an

sins herren laden komen unnd hett begert daz er im

tüch wolt geben zu einem kleid, so wolt Lorentz

Tremer gult unnd burg dafür sin, also hett er diser

zug demselben Michel ein tüch zü einem kleid geben

nemlich drye farben rott wiss unnd himelblöw,

unnd hett das gelt getroffen iiii lb iii ß xi d Basler

muntz also were derselb Michel von Basel komen

unnd hett im Lorentz Tremer das selb gelt bezalt,

das wyse er wol.

Lorentz Jacklin der Snider burger zu Basel hatt gesagt

daz er das obgemelt kleid Michel Merget gemacht

unnd hett im Lorentz Tremer der schüchmacher i lb

macherlon unnd v ß umb ein hembd, dargelihen

unnd als er gemelt Michel hin und weg wolt

scheiden, da hett Lorentz mit demselben Michel

abgerechnet des tüchs macherlon unnd

des gelihen so er im zü zerung gelihen hett unnd

were derselb Michel, Lorentz by aller rechnung

schuldig bliben sibenhalben gulden rinscher die er im

zu zeschicken zügesagt hett daby und mit sye diser

zug gewesen, hab das alle gehortt unnd gesechen.