Peter Hurling hatt gesworen unnd gesagt daz er der

Armbrosterin vogt gewesen sye, unnd in solicher vogtie

allerley wie sich geburt gehandelt hab, des im zum teil von

lengy der zytt vergessen vergessen aber so vil unnd an in in diser sach

gezogen so sye im noch wol ingedenckt, daz er unnd die gedacht

sin vogt frow all schulden so dieselb schuldig gewesen als im

furgehalten were gesumiert unnd gegenschulden dawider

unnd als dieselb frow nit einem sonnder ettwan manichem

burger zetund verbliben, da were in irem vermögen nit ge-

wesen solich schulden mit barrem gelt zebezalen, unnd hetten

uff das meister Hansen Bertold dem arbrester der de ze

mol ir knecht gewesen were, den werckzug so zu dem

armbrester hanndt werckt gehertt unnd sy gehept ze

kouffen geben, unnd hetten uff das den selben kouff

den armbroster an die denen die frow schuldig gewesen

(2)

gestossen unnd in zu inen gefurtt dieselben schulden siner

dis zugen vogt frowen usszetund unnd dem

meister Hannsen anzeschriben das ouch bescheen

solichem nach, hett diser zug von keinen anndern schulden

die sin vogtfrow schuldig gewesen sin sol gehortt,

wol stund allerleiyni den rodlen von

wilent Bernhartt Mullers seligen, da hett er diser

zug die armbrosterin sin vogtfrowen gefragt

wie die sachen der selben dingen halb gestalt

wer dem andern schuldig were gefragt, da hett

im die selb sin vogtfrow geanttwurtt sy solten

sich derselben schuld halb nit irren lasen, denn sy

zü beden sytten einander uber i ß zwen oder drye nit schuldig unnd

weren gar nach wett daz wiste sy wol daby

hett er diser zug die ding lasen bliben unnd sye im ouch

von angezegen meynung nit zewissen.

Hans Berchten der armbroster hatt ouch gesworen unnd gesagt,

daz er der armbrosterin knecht by den fünfft iaren

gewesen unnd sye war daz er Bernhartt Muller seligen

unnd anndern allerley unnd eben vil gemacht

hett daz er aber wissen oder grundtlich dasselb bestimen

kend sye im umb lengy der zytt unmoglich, unnd

konnd desshalb umb dasselb alles keinen gruntlichen

bescheid geben, unnd al er in willen komm selb

meister zewertden were Bernhart Muller sin kond (?) worden.

Er diser zug hett ouch der armbrosterin allen werck

zug abkoufft umb ein nemlich sum die im

(3)

an ir schulden so sy den tuchlutten unnd anndern

burgern zu Basel schuldig gewesen, zerlegt, sy

unnd ir vogt der obge geschriben zug in disen zugen

zü denselben gefurt die im für ein schuldner in

geschriben unnd die armbrosterin ussgetan hetten

unnd wisse nit daz die frow witter von irs mans

wegen schuldig gewesen, doch so wurd

von dem vogt unnd unnder inen von Bernhartt Mullers

schuld wegen were dem anndern schuldig were

gefragt da hett die armbrosterin gesprochen es

leg nit nott an derselben schuld denn sy wisste

wol daz eins dem andern nit uber zwen oder drye

schuldig zetund sonnder gar nach wett

daby weren die ding bliben. Es

sye im ouch nit annders zewissen denn daz Wilhelm

unnd Richartt die amptlutt sye auch by mutmasung

der schulden gewesen.