Testis productus p Fridlin Maler con

Hanns Egloff

Min hr schulths Rudolff Notcleger hatt gesagt by dem eyd

an sin ampt getan, daz sich vor ettlichen iaren wie lanng

wyss er nit begeben, hab im Fridlin Maler bevolhen wann sin

swester mit tod abganng das dann er diser zug, ir nach tod verlassen

gütt fur i c gl hauptgutt und xl gl versessner zins wegen so er

also bar [Rand Clawsenn Rebhun] fur sy ussgeben hab, verbiette sellichs er diser zug

nach abganng Fridlin Malers swester geant und darnach

Fridlin swester seligen tocher und irenn man, mit recht fur

genoemen unnd die clag gegen inen volfurtt, also hetten

sy einen uffschlag sich zu bedencken begertt und mir furer

darnach zu miner clag anttwurtt geben. Also weren sy

darnach mit dem brotbeckenn zu minen herrn dem schulthesn

kommen und an in begert, inen das ir ze ennttslachen, so

welten sy den brottbeckenn ze burgen geben unnd im

dannatthin zu recht werden, uff das stund er diser

zug dar unnd sprache herr ich besorg wenn ir inen das

gutt entschlachenn so far sy hinweg, wer gibt dann

Fridlin das sin, hette im der schulthes geanttwurtt, wenn

im einer einr burg zu burgen brecht, so nem er in uff unnd

enntschlug das gutt uff sellichs gieng er diser zug zu dem

brottbecken und spreche er solte lügen was er tätte dann er

sagte im woll die ansprach treffe sich nit wenig sy tätte

i c und xl guldin soltest du dann ir das

gutt hinweg lassen so wurdest du der tag eins rechnung

darumb geben so du es aller munst gedechtest do hette im disen

zugen der brotbeck geanttwurtt es ieret in nichs er diser zug

im geanttwurtt nu lüg darzü unnd also uff sellichs hette er

Fridlin Maler geschriben, es wie allerley enndrung mit

siner gut zu Swerstatt bescheen were unnd welte in gütt beduncken sin daz

er selber hinuff keme zu sinen dingen lugte dann er geschefften

siner herren halb, inen witter nit me nachkomen kund, also uff sellich

sin schriben, kame Fridlin haruff, unnd als er im disem zugen

sagte, so mochte er des rechten nit erwartten unnd geben Veltin

Gilgenstein vollen gwalt mit recht die sach anzenemen und

ze volfuren witter wisse er nit.

(2)

Veltin Gilgenstein hatt gesworen und gesagt das im Fridlin Maler

vollen gewalt geben unnd bevolhen hab [Hanns Egloff] den brottbekcen ennsit Rins

als burgen Fridlin Malers swester seligen tochter umb i c gl hoptgüts

unnd xl gl versessner zinsen mit recht furzenemne, sellichs er getan

hab aber uff dasselbig mal mechten sy nit furkomen, und neme er in

ver dem hochzitt ostern aber wie lanng es sye wyss er nit, fur da

redte der protbeck obgemelt mit im diesem zugen das er sollich recht liesse

an stan bys nach dem gemelten hochzitt hette er im geanttwurtt

wann das beschee [und dz iar verschine] so welte er der brottbeck dann vermeinen lidig zesin

hette er der brottbeck geanttwurtt, nein er welte darumb nit lidig sin

aber Hannsen Schorndorff darumb mit recht furnemen der hette das

hws koufft und das gelt heymlich hinder im hinweg geben unnd

wo er solliche meynung nit tun welte so musste er uss der stat Basel

da er diser zug sellichs horett welte er in nit vertriben aber ob er

Schorndorff mit recht darumb geiagt hab, wyse er nit.