Gestreng Edel vest...

... u g e wysheitt zuwüssen ist

das es umb mich und gmeinen houptlütten desglichen umb die

knechten wolstatt (Gott dem herren sig lob) Es ist ouch

nitt minder gnedig lieb herrenn als wir uff des Venedig

landtt sindt khomen hatt bäpstliche heiligkeit ein verordnetten

comisary entgegen geschickt unnd umb munition lassen versechen

das wir gantz kein mangel gehept habenn, unnd haben vier

mass wein unb ein batzen gehept desglichen käss und brott

wolfeil gsin ist, unnd nach ist unnd haben uns die Venediger

vil zucht und eer bewysen wor wir hin sindt khomen, das ich uch

gnedig ir min herren nit gnug khan schriben noch melden

unnd sindt wir den viertten tag houwenmonatts von Bolonia

gescheiden, habent unns nitt gemustrett sonder uff den rodel

bezaltt wordenn, und nun fürhin hab bapstliche heiligkeit

unns erbotten sy wellent unns brott und win zimlich gnug

vergebens gen den gmeinen knechten, als wir wol gesechen

haben den ersten tag als wir von Bolonia sint gescheiden, des

wir uns khein clag haben. Und uber vier oder funff tagenn

wollent sy uns die ander bzallig ouch geben. Den der herr

trasinier fürtt das geltt mit im, das wir kein mangel

mussen haben. Nitt witters nuwes weis ich u g e wysheit

zuschriben, dismol, unnd so ettwas witter zufaltt wil ich

u g e wysheit nit verhaltten sonder zu khomen lassen und

mich uch furbevolchen zu haben. Hiemit Gott wol uch ir

gnedig min herren in langwirigklich regierung behaltten.

Dattum der geben ist zu sant petter drizechen weltsch mil von

Bolonie den 4 tag heuwmonatts anno 1557

Uwer gestreng ersam

wysheit williger diener

houptman Caspar

von Silenen