Jorg Kötzinger der Trugker hatt gesworen unnd by dem

selben eyd gesagt, das sich ungeverlich by drw

iaren begeben hab das Bangratz Hochberg etlicher

schuld halp [gestrichene Passage]

nemlich by xii gld

so er schuldig was unnd von vlissiger bitt wegen

gefangen geben wer der diser zuig Jacob Spidler unnd Johann

Strub ietzo zu den Karthusern zu Basell fur

(2)

den gemelten Bangratz burg worden wern inn dem

hett ime Wolffganng Lachner ix kronen geluhenn (?)

die hett ys an den schuldenn geben unnd Brangratzen

zil gesetzt inn den er sy widerumb bezalen

sonnder wa er das nit tett das er dann inn die

gefanngenschafft gien solt daruss sy in dan entledigt

das er sich fry muttigelich (?) unnd gern verwilligt hett

also da die zil verschinen Bangratz hett inen nit uss

richtung getun als er sich dan vermessen

sonnder hett der gemelt Wolffganng Lachner die

obgemelt drye burgenn umb die ix kronen so er

inen gehilhen het angenommen inn sonnders den gemelten

Johannes Strub einen gawl fur xv gld verkowfft

da man im veromalen xxii gld umb het wollen

geben uber das alles hett derselb Johannes mussen

zweg zeihen gen Leon das er nit hett mogen entricht

werden unnd da er wider kom er zu Jacob Spidlen

vorgementl unnd sagt wie er sich sins zu gefugtenn

schadens halp der im von der burgschafft so er

fur Bangratzen worden were halten solt hett er im

nit konnen helffen dan er het in ein will inn sinen

tisch enthalten, doch zu letst als Got der almecht-

ig denselben Johannsen ermante inn die Karthuss

zegannd als er dan ouch getan. Doch wer er einen

unnd den anndern handtwergkernn hie zu Basel

by xiii gld schuldig unnd zu Bangratzio gangen

unnd gesagt wolt er im dieselben schulden ent-

richten so wolt er inn des ubrigen costens

so er sint halp empfanngen hett gantz fry quit

lidig unnd loss sagen, unnd hett einen vor

trag vor (...) wider uffgericht. Also dass der

hochgelert hr (...) doctor von Windegk hie zu

Basel dieselben schulden der xiii gld bezalt

und Jacob Spidler sich unnd sin hawss fur Bra-

gratzin gegen demselben doctor verscriben solt

als er ouch getan hatt doch als wie sich Jacob

Spidler gegen dem doctor verschrib solt sich Ban-

gratz gegen denselben Spidler widerum inn der

besten form verschribenn, das aber er diser zuig

(3)

wiss ob sich Bangratius eefrow ouch verschribenn

solt oder inn den vertrag beredt worden sye oder nit

sye im disen zuigen nit eigentlich wissennt aber

doch hab Brankgratz eefrow allweg gesagt sy wölle

das best hierinn furkeren.