Ich Johannes Eylanndt burger zu Lucern

an statt unnd ihn namen, des erenvesten

fürsichtigen wysen herren Peter von Pro ober-

ster houptman, unnd sunst andrer gemeiner

hauptlüten oberster richter obegemenns (?) der

eidgnossen diss piemundischen zuges, bekhenn

unnd thuon khuondt offelich mit disem brieff

wie das ich von Peter Grysach wonhafft zu Lucern

angfochten worden, wie das Gallus Rechen-

berg burger zuo Lucern, von inenn ettlichenn

under houptman Basthian und Stofflen

beid die Feeren brieff und gelt uff genomen

inen ihn truwen heim zu füren, darumb

aber ettlich iren der selben wyber hierin ge-

schryben, so ime da heimen vor gebürlicher

oberkeit in recht verfast, dorumb inen

hierin gschriben, gschrifftliche kuntschafft in-

zenemen von den benempten personen

deren namen wie hernach volgt. Namlich

Marti Hege von Lucern bezügt unnd redt

by gschwornem eide, so er in der ordinantz

geschworn, das er gsehen hab, das Peter von

Grysach, ihn ein brieff than und bunden hab

drü gold kronen, fünff real der vierfachen

unnd ein pfenning der hett golten funff

real den selben der frowen zu ein butpfening

geschickt [am Rand: ouch der fierfachen

realen einer petrag schweizer sölt wenden]

und ettlich klein realen iedem kindt

welches im brieff dem Galli Rechenberg, so

man nempt Schumacher über antwurt sy

worden, unnd des zuo ein wortzeichen, hab

Peter ime zügen, ouch ein brieff sinem vetter

Marti Hege gschriben, in den er züg ein halben

real than zu ein bütpfenning, der selben sin

zügen brieff er Petter in den sinen gelegt

drin beschlossen.

(2)

Hanns Marti Grübel von Lucern bezugt und

redt by obgemeltem eid, das sy beid, Peter

und er züg, mit ein andern sigen gangen und

ine brieff, mit ein andern ime Gallin über-

antwurt, und das Galli sy vertröst er welle

guot sorg darzu haben, als wen es sin eigen ding

were, und namlich als er Peters brieff ihn

henden hette, sehe Galli da ist ein guotz plümpi

by ein andern.

Hans Braun von Lucern bezugt unnd redt by

ordinantzischem eid, das er darby unnd

mit sy gsin, das Peter Grysach, dem Hans

Martin Grübel sinen brieff gschriben unnd er

funff guot gold kronen in brieff beschlossen

das hab er gsehen, darby habendt sy beid,

gseyt, sy wellendt die brieff Gallin Rechen-

berg über antwurtten er sy aber by der über-

antwurttung nit gsin.

Und des zu urkund und warer zugknus

hab ich obgenanter Johans Fylandt mein eigen

bittschier hieruff getruckt beschehen zu Genolla

in yl dan ettliche fendlin uff brechen müssen

handt, frittags den 20 tag ougstmonats

das 1557 iars.