Hanns Spiegler hat gesagt by den eid an sin ampt getann

unnd volgt der versprechnus uss des gerichts zu Basel

inn allen begriff denn des mer, das im Panthaleonn

glopt unnd versprochen hab by dem eid sinen herren

getann sich inn achtagen is genn Basell zestellenn unnd

daruss nit komenn erhab dann Hannsen Hagenbach

vernugt siner schulden unnd uff den tag als er die ver-

sprechnuss getan inn den zuigen gebetten mit im zu

Hagenbachs frowen zegienn und besehnn ob er

sy erbitt zill zemachen damit er in so

bezalenn möcht. Desshalp er diser zuig von geschefft

wegen sinen herren nit het mögen mit Panthaleoin

gien sonnder Hannsenn Hebdenring den fryen ampt

man gebetten mit Panthaleon inn sinem namen

zehanndelnn was aber derselb darinn gehanndelt

sye im disem zügen nit wissent.

witer sagt Hanns Spiegler by dem eid an sin ampt

getann das Pannthaleonn Agkermann uff den

tag nach lut der versprechnus sich har gen Basel

gestellt unnd inn disen zugen gebetten hab mit

im zu Hannsenn Hagenbach zegienn und im

helffen zil machenn den er hab ietzo dess gelts nit

das hab er diser zuig nit konnenn thun vor geschefft

siner her sonnder Hanns Hebdenring gebetten an

siner statt mit Panthaleonn zu Hagenbach zegien

unnd mit im reden inn sinem namen diser zuig

wiss aber nit was Hebdenring inn solchem gehanndelt

hab.

Hanns Hebdenring der fry amptman hat gesagt by dem

eid an sin ampt getan das sich ungeverlich

begeben hab vor etlicher zitt sye Pannthaleon

Agkermann zu im komenn unnd in gebetten dass er

mit im zu Hagenbach wol genn dann Spiegler

inn des ouch gebetten het unnd besehen ob er im

(2)

mocht helffen zill machen das hett er diser zuig getan

unnd als sy in Hagenbachs huss komen wer Hagen-

bach nit anheimisch sonnder uber veld gewest da

hett er diser züg mit Hagenbachs frow geredt der

meynung im zill zegeben unnd ze machen das het

die frowe nit wollen und unnd gesagt

sy torft es nit tun dan ir [man wer nit anheimsch und ir

deshalp nut bevolhen]. Also hett Pannthaleonn gesagt zu im

disem zuigen er söllt der frowen uff morgnn

zu recht verkundenn das hett er diser zuig getann

aber morndes hab er nymat iro beider halp

vor recht gesehen uss der ursach er nit wissen

mog ob sy sich mit einander vereinbart haben, oder wie es furer

erganngen sye.