[Zeugenaussage für Johan Hatschermann (?) gegen Hans Schmid von Rheinfelden]

Lienhart Rennger vogt Hanns Hering Hanns Dinzenbach

Heini Zschardlin unnd Anndres Stingelin all von Ariss-

torff hab all gesworen unnd einhelligclich gesagt da ietz

uff sonntag nechstverganngen xiii tag gewest als sy

von Aristorff har gen Basel wertz haben wöllen gann

zu minem gnedigen hern von Bernfels sye Hanns Heitsch-

lin inen ob dem rott huss by der hart bekümern den

hab nemlich Lienhart Rennger der obgemelt zuig

einen gefragt war er woll hatt er inenn geantwurtt

er will gen Rinfeldenn zu Hannsen Schmid der hab

im dryzehen vas mit wynn ze kowffen geben doch also

waren Hanns Schmids eefrow sich nit verschribung wol

soll der kowff nutzit sin verschrib sy sich aber darfür

so soll er im allweg uff sanntt Martins tag xxx gld

darann geben so lanng bitz der win bezallt werd

unnd wernn also von einander gescheiden unnd sy dise

zuigen har gen Basel ganngen unnd als sy widerumb

heim gingen kom Hanns Heitschlin inn der hart wider

zu inen disenn zuigen unnd fragten in was er ge-

(2)

schafft der hett inenn geanntwurt er wer by Hannsen

Schmids frowen zu Rinfelden gewest unnd ir den

kowff mitsampt der verschirbung die sy

darfür thun must die het im geanntwurt sy wolt sich

inn keinem weg darfur verschriben [am Rand: unnd im verbotten

den win nit ze gebenn]. Daruff Hanns

Ditzenbach geredt unnd Hanns Hanns Heitschlin

gefragt ob er den wyn noch inn dem keller der het

gesagt ia. Da het er furer geredt so habt ir gut machen (?)

witer so sagenn Anndres Stingelin Heini Zschowlin das

sy von Lienhart Renngers frowen uff sant Martin

tag gehört haben das die gesagt wie sy

uff dornstag vor sannt Martin tag zu Rinfelden

gewest sye sy by Hannsen Schmids [uff den mergkt gesin unnd sy]

gefragt wa Hanns Schmid sye die hab derselben frowen

geantwurt er sy gen Basel unnd woll mit HAnns

Heitschlin rechnen von wins wegen den er im abkoufft

hab unnd wann er im den schon mit recht ang-

wynn so wöll sy sich darfur nit verschriben noch

dhein burgschafft geben. Dessglichen so sagen die

selben zwey zuigen das sy die wort von Lienhart

Renngernn ouch gehort hb, das er die wolt

so sy die zuigen von sin frowen gehort er von ir ouch

gehort haben.

Margreth Dintzenbach hatt gesworen unnd gesagt das

sy die zuigin uff dornstag nechst vor sanntt

Jorgen tag begeben da sy dise zuigin zu Rinfelden zu margkt

gewest sye Hanns Schmid eefrowe zu ir dise zuigin uff

dem margkt gesin unn dir eyr abkowfft und gesagt

ich glows minme man sye hinacht zu Arstorff gesin

daruff dise zuigin geredt ia. des hett ir Hanns

Schmids frow witter geanntwurt er will gen Basel

mit Hannsen Heitschlin umb wyn rechten unnd wan

er im dem schon an gewynnt so wöll sy nit bürg

darfur werden, sonnder woll er von huss unnd

hoff gan.