Testis productus pro Symon Urlinger de Randts-

wiler g Veltin Gilgenstein

Hanns Ott von Ranndswiler hatt gesworen unnd gesagt

das sich ungeverlich vor xii oder xiii iaren begeben

das er diser züg mit Hannsenn Urling har gen Bael

gefaren mit kornn dan dessmals das korn fast wert

gewest unnd da sy das korn verkoufft het Hanns Urling

zu im disem zuigen gesagt lieber gee mit mir zu Veltin

Gilgenstein dann min vater mir bevolhen hat so bald

ich das korn verkouff soll ich Veltin i lb iii ß gebenn,

denn er im die schuldig sye. Das het er diser zuig getan

unnd werenn zu Veltin Gilgenstein komenn unnd Hanns

Urling zu im gesagt min vater ist dir i lb iii ß schuld

die will ich dir bezalen het Veltin geantwurt

du bist mir mer schuldig des zuch ich mich an min

buch unnd het das Jacob von Magstatt der ungevard

auch zugegen gewest fur gelegt das zolesen da het er

das nit komen lessen inn dem het er gesagt min

schulder kan es wol lessen unnd im das furgelegt

der het gelesen das er im ii lb vi ß

schuldig wer daruff Hanns Urling geredt im

will ich dich ob Gott wil bezalen unnd solt ich ohne

gelt uss der statt bringen unnd im das gezelt ii lb

unnd vi ß daran er genugig unnd im lidig ge-

zalt hett das sye im disem zuigen wol zewissen.

Jacob von Magstatt hat gesworen unnd gesagt das

sich ungeverlich vor xii oder xiii iaren begeben sye

er diser zuig uff einen fritag har in inn die statt

Basel inn Veltin Gilgensteins Huss komen und funnd (?) den

obgemelten zuig Hannsen Urling unnd einen genant

Hannsen Kesler der sess ob einem buch unnd sagt ich

kan mich uss dem buch nutzit verrichten dan es ist

eins teils durch strichenn unnd eins teils nit daruff

er diser zuig ouch zu dem buch ginng da inn meynung

das ze lesen sagt Veltin ich will es also lassen bestan

bitz myn knab kumpt der kan es wol lesen unnd

volgt des obgemelten zuig sag inn dem uberigenn denn

(3)

des mer da im Hanns Urling siner schuld

so inn dem buch verlesen worden bezalt sagt er

inn lidig unnd brecht ime eine mass wins

zetrincken unnd sagt ich wolt das all min

schuldner also ubermich erzürnen (?) unnd mich

also bezalten darumb wolt ich uch einen

gulding zevertrincken schencken.