[Aussage für Albert Pfaff gegen die Meister der Fischkäuffler]

Hanns Pfaff von Istein (?) hatt gsworen und gesagt das sich vor etzlichenn

zitten begeben hab er diser zuig sinem bruder Albrecht Pfaffen

etlich gelt zebehalten geben, das sich ungevärlich bi den xxx

lb getroffen. Also hab er das gelt an sins bruders

frowen uff ein ungeverliche zitt ervordert, die hab sich

dieselb sins bruders frow ubel gehept unnd gesagt das gelt

sye verloren unnd wisse nit war es komen sye darab er

diser zuig erschrocken unnd zornig worden. aber er wisse

woll das er ine keinen dieb nye gescholten hab und gestee

das ouch nit wol hab er im sust geflucht und gesagt

und zornig worden zu der frowen gesagt wist er wa sin

bruder wer er wolt ein messer inn in stechen und im

ubel geflucht aber das er ine sin eren geschuldigt oder

(2)

gediept hab er nit getan gestee das ouch nit dann das ietze

ungeverlich by iii iaren sich begeben das ein vertrag des gelts

halp so verloren ist zwuschen im diesem zuigen und sinme

bruder Albrecht davor genant durch ersam lutt uff gericht

worden wie er ime desselbe verloren gelts bezalen söll, das

sin burder Albrecht bitz har erbartlich volzogen unnd clag

nutzit ab sinem bruder wiss ouch nutzit von ime dan

als er liebs und guts.