Testis productus pro Conradum Lutzelman

contra Ulin Bener (?) de diessbach

Jacob Lutzelman hatt gesworen unnd gesagt, als er Ulin Bener

uff die schuld so er im und annderen zu Diessbach zetund were,

viertzig gld zu Basel geben hett, da sye im noch wol angedenckt das

er diser zug, wol konndt mercken daz Zlin Bener dar uff

drungen daz er Conratten Lutzelman sin vettern hinder die schuld bringen

tatt, uff solichs wer er diser zug zu Conratten sinem vetter

ganngen unnd hett mit im geredt uff ein solich meynung

er konndte wol erwegen daz Ulin gern in Conratten hinder

sin schuld brecht er selt sich aber hutten unnd keins wegs darhinder

kommen, denn er wol wisste wie er mit inen verkomen solt,

er sagt auch Conratt hab weder in dem noch anndern dis zugen kouffen so er

ye getan weder teil noch gemein gehept, noch ouch

gegen yemand sin burg ye worden sye, er diser zug hab ouch

Conratten nye darumb gebeten.

Magdalena des obgeschribnen zugen eefrau hatt ouch gesworen unnd

gesagt daz uff ein zytt, zwen man von Diessbach in diser zugen

eeman abwesens har gen Basel kommen weren unnd hetten sy an gestrengt

umg gelt so inen Jacob ir eeman schuldig sin sol, unnd nemlich

gesagt von xii gld die er inen geschickt haben solt, das nit beschen,

mit beger an sy das dasselb gelt entlich nun welt denn sy das

haben mussten, uff solichs sy diss zugin geantwurtt sy hett kein

gelt ir man were nit anheimsch so komend sy nutzit entlechnen,

daruff sy mit diser zugin geredt sy musten gelt haben sy solt

zu Conratt Lutzelman gan unnd das gelt umb in entlechnen

(2)

daruff sy inen geanttwurtt unnd solt sy hunngers verderben unnd

von hus hofe unnd die statt kommen so bett sy Conratten

Lutzelman umb kein fursatz gelt zelihen also hett sy derselb

Conratt gement, unnd wisste in noch yemand zubitten,

sy wisste aber nit annders dan ir man inen das gelt by Ulin Bener

geschenckt, dar uff hetten sy geredt Ulin Bener hett inen nutzit

geben sprech sy hatt er uch nutzit geben so ist doch Ulin ein

abenturiger man, daruff die selben von Diessbach sprachen ia frifing (?)

er ist ein abenturiger man in sin sack, unnd also weren dieselben

zwen die nacht by ir in irem hus bliben, unnd emmorndes

hetten sy aber mit ir geredt das gelt zeentlichnen oder aber mit Conratten

Lutzelman zereden hett sy inen anttwurtt geben wie obstatt

sy konnd nutzit entlechnen u welt sy auch Conratten Lutzelman

nit bitten, da hetten sy gesprochen sy musten das gelt in xiii tagen

haben, unnd sy solt mit inen zu Conratt Lutzelman gan unnd

mit im helffen reden daz er das gelt darlichen wolt, da hett

sy aber wie vor gesprochen sy wolt nit zu Lutzelman gan, aber inen

gern das hus zeigen, unnd wern mit einander ganngen

da hett sy dieselben zwen von Diessbach bis an die gassen

da Conr Lutzelmans huss gelegen gewisen unnd inen gesagt ir

werden ein huss sechen mit einem grawen getterlin das ist

Conratt Lutzelmans huse also weren die selben zwen

von ir diser zugin gescheiden unnd darnach wider zu ir

diser zugin komen da sye dise zugin nit wissend daz

sy ir gesagt hetten daz sy by Conratten Lutzelman gewesen

wol sye war unnd iro ingedenck, daz dieselben zwen

dise zugin gebetten hetten mit Iacoben irem eeman zereden

inen das gelt in vierzechen tagen zeschicken, da mech sy sin

(3)

sy hett inen geanttwurtt weist aber das nit eigentlich sy were

solichs irem man sagen unnd verfugen demnach Conratt Lutzelman

hinuff wandelte daz ir eeman Iacob Lutzelman inen das gelt

in xiiii tagen by demselben Conratten hinuff schicken must daz sy aber mit denselben zweyen

zu Conratten Lutzelman gangen in umb lihung oder burgschafft

gebetten oder daz sy gehortt daz Conrat Lutzelman zugesagt hab, das

gelt in xiii t lenung oder kurtzer hinuff zeschicken, sy nit hab

das nit gehortt sye zu Conratt Lutzlman solicher sachen halb

nye komen hab in auch desshalb umb nutzit gebeten denn

Conr were iren eemen do zu zytten wol so gram als

sy vermeint unnd hetten die von Diessbach einen gulden für

ir schuld wollen nemen Conratt Lutzelmann hett den für

iren eeman nit geben.