Junkher Peter Schonkind hatt gesagt by dem eyd einem ratt getan,

daz sich in vergangen ioren begeben, daz einer genant Diepold Kerlin von Strassburg

har gan Basel us Frankrich ze fyss fast bloss an hab unnd gelt mit

sampt Iheros Tagstein komen sye, unnd hab im disem fur

gehalten wie er erlich in Franckrich von hus uss geritten unnd

im aber missgangnen daz er an rossen hab und zerung ab

komen sye unnd damit er nit so armclich heim kem

so hett der selb Diepold Kerlin in disen zugen gebetten im dru

pferit so er dozemol gehopt zu kouffen geben daz er diser zug

getan und Diepold Kerlin die selben iii pferrdt umb xiv gld

rinischer verkoufft und darnach hett in diser zuge der

vermelt Diepold Kerlin angestrengt demnach er nit kleidt were,

daz er burg fur in umb gwand werde daz er ussnemen welt

unnd hett in diser so witt erbetten daz er für den vil

gedachten Diepold Kerlin gegen Hannsen Hiltprannd dem gwandt-

man fur xxx gld gutt worden für bede sumen

umb die pferrdt und gwandt obge Diepold Kerlin unnd

Ierominus Tagstein im disem zuge ein verschribung die zu nemlichen

zylen zebezalen underscheidenlich gegeben hetten, unnd als

Diepold Kerlin im nit gehalten hett er in gen Rottwil furgeladen

unnd ettliche gericht uber in ganngen in dem er unnd vor daz

Diepold Kerlin zu acht erklagt were er todes halb verschieden

unnd

in sonders vor unnd ee er in mit recht zu Rottwil furgenommen

da hett der stattschriber hie zü Basel in den sachen gehandelt, unnd

wer im disem zugen durch ettlich schrifften von Hanns

Gerger ussgangen antwort unnd furgehallten so vere

r den costen wolt nachlassen so welt er daran sin

damit im disem zuge das houpt gütt nach lutt sins

brieffs ussgericht unnd bezalt werden solt

(2)

und als er das nit tun noch den costen nachlasen

da so er riss er dieselb missiven und wurff die stuck

hin und enweg desglichen were ouch dem stattschriber zu

geschriben worden ob er diser zug hundert und x gld

nemen so wolt er daran sin daz im Hans Ber zu Basel

das halb anrücks usrichten und das anderhalb

in monatz frist darnach bezalt solt werden unnd der statt

schriber der solt umb ein par gld oder zwey witter macht haben

in der sach zebesliessen. Und als der stattschriber in disem

zuge (?) die sachen ouch fürgehalten, da hett er der dingen nit

ingan sonder in krafft siner verschribung houptgütt mit

sampt dem costen haben wellen und als im aber das nit werden

mecht unnd Diepold abgangen were er geursacht worden

hr Marx Kerlin sinen Diepolds vatter seligen umb solich

anfordrung unnd schuld furzenemen daz er ouch getan

und hr Marx Kerlin gen Rottwil tün furladen derselb

hett daselbs zu Rottwil uff sin clag die er slechtlich nach

innhalt sins schultbriefs zu im getan, genattwurtt er

were nit verschriben hett sich ouch fryheitt nit verzigen mit beger

im als ein burger der statt Strassburg zewisen daruff er

in krafft derselben friheitt gen Strassburg gewissen uff das

hetten die von Strassburg im ein tagsatzung mit sampt einem

geleitt wie bruchluch sye zü gesamt unnd als er hinab

geritten were gen Strassburg in meynung denselben tag

unnd recht zeverstan, da were im unnder wegen gesagt daz

hr Marx Kerlin das ein pferrdt so er diser zug Diepolden sinem

sun zekouffen geben, dahar die schuld zum teil rurtt, in finen gwalt ge-

nomen genutzt und genossen, ouch das zu Enhuhen

verkoufft unnd das erlost gelt in sinen nutz

empfangen behaten und verwendt solich meynung

er zu Rottwil nit furgewandt denn er die nit gewust

in hoffnung wo er die in Rottwil schon gericht gebrucht

(3)

Hr Marx were nit gewisen worden, unnd als er diser

zug gen Strassburg mit hr Marxen für ratt als zu

rechtlicher verhor keme clag unnd anttwurt bescheen

da were ein urttel zwuschen inen gangen so vere unnd

hr Marx by sinen swerenden eyd tett behalten dan er

Diepold sinen sun nit geerbt nach des sinen utzit empfangen

noch innnhett so solt er der clag diss zugen ledig sin. Also

wurden sy bede pthyen in ein stuben als er vermein in

die cantzly gewisen, und also hett ein schriber her Marxen

gefragt ob er die urttel erstatten unnd nach deren innhalt

sweren welt oder nit daruff hr Marx geanttwurtt er

moch wol sweren unnd welt den eyd tun, in dem hett

diser zug geredt hr Marx ir wellen einen tag oder zwen

bedanckt nemen dem ich wirtt bericht ir haben das

ein ross so ich irem sun zekouffen geben hab verkufft

unnd das erlost gelt in wider nutz verwendt wie komen

oder mögen ir dann sweren ir hoch vermanande sich zebedencken

daruff hett im hr Marx geanttwurtt sin er hett sinen

su zehn moln me geben und angehenckt dem dasselb pferdt wertt were,

und also nach vil wortten hett hr Marx Kerlin gesworen

unnd den eyd getan lutt der urttel daby er diser zug

die sachen hett lasen bliben unnd sin anforderung an

Ieronis Tagstein als underscheidenlichen schuldner furgenommen.