Testis productus pro Johan Waldkilch contra Egudin (?)

Rögklin inn liengen (?)

Cunratt Husgöwer hatt gsworen und gsagt das er diser

züg uff ein ungeverliche tag inn des Waldkilchs huss gewesen

sey Gilg Rogklin zu inen komen und dem Waldkilch iii lb

gelts bracht an einer rechnung so (?) sy darvor mit ein andern ge-

tan hetten. Daruff hett Waldkilch gesagt lieber Rögklin

wie bringstu so wenig gelts, het er der Rögklin geantwurt

lieber Waldkilch tund ietzo das best ich habe nit me da bitt

ich uch umb, da hett der Waldkilch das rechenbuch genommen

und die dritthalp lb gelts ingeschriben die er im an der

schuld bezalt hett unnd die uberige schuld

im vor gelesen da wer er wol gnugsam gewesen on einich

inred.

Ludwig Waldkilch hat gsworen und gesagt das er diser zug

im dem Gilgen die rechnung uss dem buch vorgelesen

und hab er der Rögklin gesagt lieber Waldkilch tund ein

uberigs (?) ich wolt uch fünff lb gelts bracht haben da hatt

mir der alt vogt zu Liengen (?) das gelt als vertan bis

an die iii lb und gehilt der andern sag sonst im alle

puncten und mercken (?)

Jorg Muller genant Snider von Rebheim hatt gesworen unnd gesagt

daz sich uff ein tag by einem iar vergangen ungevarlich begeben als er diser

zug unnd die obgeschribnen zugen in Waltkilchs stuben gezert da were ein man

komen den er nit bekenn unnd hett mit Waltkilch gerechnet unnd

were der schuld eben vil die der selb man Waldkilch schuldig blib,

er wiss aber der sum nit eigentlich zebestimen und nach allen

dingen geb derselb man Waltkilch by iii lb in baselplaphart

als im beduncken wolt an die selb schuld unnd were der vil

genant man der rechnung gichtig die im vorgelesen wurd

dem er ganz nutzit der in redte sonnder weren sy also von ein

andern gescheiden daz er in irem by wesen nutzit dar in geredt hett.