Agatha von Uberlingen Hanns Kretzen des kuffers by Sant

Elsbetten eefrow hatt gesworen unnd gesagt daz sich uff ein

zytt by zweyen iaren lenger oder kurtzer ungevarlich begeben daz

sy dise zugin zum Rutzfus gewesen da were ein man

ouch da gewesen und hett Katharinen Roggensprengerin nach

gefragt unnd in sonders gesagt wie sy ein schuben von

einer frowen haben solt zü pfandt. Nü were zil und tag der losung

verschinen unnd hett die selb frow by den selben zytten als der

solb man sagte kein gelt unnd konnd die schuben nit losen dess

halb so sagte er der bott der gedachten Katherinen Roggenspergin

die da zu gegen komen were, sy solt die gemelt schuben verkouffen

als were sy ir oigen, denn sy by deselben zytten nit gelt hett,

ob aber die selb schub der frowen so yetz mit Katherinen in recht

stand gewesen sye oder nit oder ob der bott von derselben wegen geredt

hab oder nit oder wie die schub gewesen oder was farb die gehept hab

das mög sy nit wissen, witter sye ir angezogen dingen halb nit kund.

Jos Bildschmutzer der wirtt zü Wilen hatt ouch gesworen unnd gesagt

daz sich in verganngen tagen begeben daz in ein welchin ein gutte dirn gebetten

hett hie zu Basel mit iro zegand zu einer koifflerin so gesessen were zerenntten

unnd iro zeverhelffen ein schuben kouffen die an dem selben ortt feil leg unnd

als er mit derselben frawen daselbs hin komen, da were in die schub gezeigt

unnd als sy die schuben besehen da hett die welchin in disen zugen gebetten

sy verstund sich der ding nit iro ze raten, unnd als er diser zug iro gern das

best getan unnd die schuben eigenlich besehen, da hett er derselben welchin

geratten unnd gesagt diselb schub were ze nemen unnd zegeben umb ii gld

unnd sy were unbekleidet unnd sy solt die schuben nemne so vern

ir umb solich gelt gelasen wurd. Also nach vil tadungen were der welchin

umb die zwen gld ungevarlich ze kouffen geben unnd hab die schuben eigentlich

besehen die were rosyerott oder uff die selb farb tunckel rott mit swartzem samen

umb das houptloch unnd die ermelt verbrempt

unnd were ver die brust ettwas beschaben unnd nach der welschen

artt usgesnitten, unnd als in beduchte kanndt er nit ermessen daz

diselb schub nit uber zwen gld wert gewesen were, unnd hett er diser

zug mitt namen gefragt was die schub gewesen hett die koifflerin gesagt

daz die schub zum rutzfus versetzt were einer frowen die welt ir gelt haben

(2)

Lienhard Spetten sagt by dem eyd deshalb gesworen daz er eben

uff die zytt als der obgeschriben zug der welchin hett

helffen die schuben kouffen unnd hett gehörtt daz

die schub umb zwen gulden verkoufft were unnd gehillt

der obgeschriben sag.