Ich Jacob Ratzenhoffer burger zu Lutzern zu diser zit bäbster

heilt gwardi der eydgnossen richter zuo Rhom, us

gheiss und bevelch des strengen fromen, edlen vesten

fürnemen, ersamen und weisen, jungcker Caspar Leo,

von Silenen, ritter, burger zuo Lutzern, landtman

zuo Uri und Schwitz, meines gnedigen lieben her houptman

dis nachfolgend kunttschafft zu verhören und in gschrifft

verfassen eines todschlags halben so uff hüt datto

diss brieffs hie in disser gwardi beschächen, darmit bas

mine gnedige herren des bas bericht denn landtag,

darüber zuo haltten, welches ich by wessen nach benempten

personnen gethon, und ist namlich der todschleger Basti

Fry me genempt der Koller von Adligenschwil in der

vogti Hapsburg gelegen, der hat sin eewib umbracht

lutt der kuntschafft hie nach folgend, in biwessen

dissen personen verhört.

Hans Schiner von Wallis gwardi lütenampt

Jost von Wätwil gwardi fändrich

Wilhelm Thilman weibel

Bernhart Kopp weibel

Jost Janns wachtmeister von Lutzern

Hanns Stächeli wachtmeister von Zug

Basti Stogel schärer

Ruodolff Müller schärer

Hand wir ob genanten all die wunder besächen ist ein stich

by zweyen fingeren breitt gsin, im rechten bein in

der ticke gegen der mus ist vast miten in der ticke

des beins gsin.

(2)

Die erst kuntschafft

Margrett Hanns Mentzen von Underwalden eewib, züget

also, sy sige vor irer thür gesässen und gspunen,

an der äschen mitwochen, uff den 19te tag hornung,

wie ir der man im palast gsin ist und dienet wie

dan der bruch ist, i dem sige der obgenant Basti

Fry so under der portta der wacht gsin sig, ins

carthier khon und follen win gsin, und zuo siner

frowen Ursela genant gsprochen, nu gib mir ein

jullier flux, hab sy geantwurt ich han wärlich khein

gelt, hab er gspeitt nu gib mir ein jullier schnel

du must mir gelt gän, hab sy aber gsprochen ich han

khein gelt wärlich han ich kheins, do sigend sy

mit ein anderen gegen irer herberg gangen, hab er

sy zwungen das sy mit im über uffhin in die herberg

syge gangen, glich darnach hab sy die Ursela ghört

ein schrei lon, und sige gstägen abhar khon louffen

und sich vor der thür uff die mur gesässen, sige der

Basti nachhar khon, und gsprochen war loupfstu hin,

do hab si die händ uff ghan und xeit, Basti las

mich ietz reuwig ich pit dich durch Gotz willen, und

syge den wiber zu glouffen, die vor des furieren

herberg gsässen und gspunnen, da sige si nider gfallen

sye er nacher gloffen und gsprochen gelt ich han dich

troffen, hab sy geantwurt ich meinen woll du habist

mich throffen, und dem nach ee dan in einer halben

stunde verscheiden, sovil ir darumb zuo wussen.

Die ander kuntschafft

Anna Hans Fitzen meitli züget also, wie sy da nider

im graben vor iren thür sye gsässen und gspunen

(3)

hab sy wol ghört das der gemelt Basti mit siner frowen

kriegt und iren wellen ein jullier an gwunen

hab sy alweg gseit sy hab kheins gelt, syge sy im

graben ussen gsin und er inen für, in des Mathis

Rechensteins keller da sy purstet hand, und hab sy

wellen zwingen sy sölle im die thür uff thon, und

hab er aber die thür inen für beschlossen ghan, do

hab er die thür mit den feussen uff gstossen, unnd

hinuss khon, sige sy by gstanden, und hab die blumen

wider in gsetzt die er vorhin us der herberg abhin

gworffen hab, heige sy inn gebätten er soll sich

ein wenig legen, dass er dan wider uff die wacht

khünde khon, hab er gseit lug ists Petter Schärers

herberg offen so wil ich da selbs uffhin gon, hab

sy glugett, sige sy nit offen gsin, und sye mit im

durchs Mathis Rechensteins keller uffhin gangen, und

wie er inn sin herberg khon sige, hab er mit der halbarten

in das (?) fenster gstochen das die stucki in graben abhin sigen

gfallen, glich hab sy ein schrei glassen, witter wisse si

nit wie es oben gangen sye.

Die dritt kuntschafft

Barbela Hubmülleri Michel Schuorpff vonn Rottenburg wib,

züget glicher form und gstalt wie des Fitzen Anna.

Die viert und letst kuntschafft

Adelli Jacob Stangen Meitli züget sy hab gsächen wie sy beide

mit ein anderen uss des Rechensteins keller khon sigend,

unnd gegen irer herberg gangen, hab er die halbartten

erwüscht und mit im die thür gstochen, und die stägen

usshin gangen, und habe gseit es wirts läben costen

(4)

unnd sy zwungen das sy ufhin hab meussen gon wie er uffhin

khon syge hab er angfangen inn die fenster houwenn

und schlagen, glich do hab die Ursela ein luten schrey

glassen, und sige hinab khon für die thür, und gsprochen

o du min Basti hastu mir so gnuog gän, unnd wie er

ouch abhin khon sye do syge sy gegen den wiberen gloffen

vor des fureren herberg und da nider gfallen, syge

er nacher gloffen und sy wellen uff han, hab sy nit

mögen mer ston habe er gseitt er habs nit thon, hab si

die Adeli gsprochen wär hats dan thon, in dem sye er

davon gloffen, sovil sy ir darumb zuo wüssen.

Dise zügen all hand ire red und gebne kuntschafft mit

iren uffgehepten eyden zuo Gott und den heilgen bestätet,

und des zuo urkhund so han ich obgenantter richter

min eygen insigel unden uff dissen brieff thrucken

lassen, und ouch disse khuntschafft damit beschlossen

und verwart, doch mir und mine erben allwägen

one schaden, und beschächen zuo Rom uff äschenmit-

wochen, ann dem 19te tag hornung, als man zalt nach

cristi jesu, unsers einigen heillands ... äligmachers

geburt, thuosentfünff hunderts ... und ein jar.